Atom energııasy jónindegi agettik tóraǵasy Almasadam Sátqalıev búgin Qazaqstandaǵy alǵashqy atom elektr stansasynyń qurylysyna baǵyttalǵan ınjenerlik-izdestirý jumystary bastalǵanyn jarııalady. Úlken aýylynda ótip jatqan is-sharaǵa agenttiktiń sheteldik seriktesteri, otandyq ǵalym-mamandar, Almaty qalasyndaǵy MEPhI fılıalynyń stýdentteri, bolashaq atom salasy ınjenerleri, sondaı-aq jergilikti turǵyndar qatysty.
Búgingi saltanatty shara ınjenerlik-izdestirý jumystarynyń bastalýy – Qazaqstanda atom elektr stansasyn salý jolyndaǵy negizgi daıyndyq kezeńi, oǵan naqty ýchaske men qondyrǵynyń konfıgýrasııasyn tańdaý ǵana emes, sonymen qatar búkil jobanyń qaýipsizdigi, senimdiligi jáne ekonomıkalyq tıimdiligi de baılanysty.
«Qadirli aǵaıyn, qurmetti áriptester, dostar, sheteldik seriktester! Búgin biz «Rosatom» memlekettik korporasııasymen birlesip, Qazaqstandaǵy alǵashqy atom elektr stansasynyń qurylysyna baǵyttalǵan ınjenerlik-izdestirý jumystaryn bastap otyrmyz. Bul kezeń – joba úshin asa mańyzdy, sebebi ol bolashaq stansany ornalastyrýǵa eń qolaıly alańdy anyqtap, keıingi jobalaý jumystary úshin qajetti ınjenerlik jáne geologııalyq derekterdi jınaýǵa negiz bolady», dedi qýanyshyn jasyra almaǵan Almasadam Sátqalıev.
AES qurylysynyń jobasy halyqtyń keń qoldaýymen júzege asyrylyp jatyr. О́tken jylǵy respýblıkalyq referendýmda el halqynyń 70 paıyzdan astamy bul bastamany qoldaǵan bolatyn. Ásirese, Úlken aýylyndaǵy turǵyndardyń 97 paıyzy qatysyp, olardyń 90 paıyzǵa jýyǵy «jaqtap» shyqty. Bul jobaǵa úlken qoǵamdyq mandat berdi.
«Qurmetti Úlken turǵyndary! Úlken – elimizdiń ǵylymı, tehnologııalyq jáne adamı kapıtaly damıtyn ortalyqqa aınalyp jatyr. Jobaǵa ınvestısııalardyń jalpy kólemi 14-15 mıllıard dollarǵa jýyq sommany quraıdy. Sonymen qatar, qosymsha 1 mıllıard dollar áleýmettik nysandar men zamanaýı ınfraqurylymnyń qurylysyna bólinbek», dedi qosh habardy jetkizgen agenttik tóraǵasy.
Onyń aıtýynsha jobada otandyq kásiporyndar men zertteý uıymdarynyń belsendi qatysýyna úlken mán beriledi. Bul jergilikti óndiristi jańa deńgeıge shyǵarýǵa, myńdaǵan jańa jumys oryndaryn ashýǵa, al ıadrolyq ǵylymdy – jahandyq standarttarǵa saı damytýǵa múmkindik týdyrady.
«Is-sharaǵa Almaty qalasyndaǵy MEPhI fılıalynyń stýdentteri, bolashaq atom salasy ınjenerleri qatysyp otyr. Bul sımvoldyq. Joba qazirdiń ózinde elimizde ǵylym-bilim men ınjenerlik mekteptiń damýyna serpin berýde. AES jobasyn júzege asyrýdyń arqasynda elimiz mamandardyń jańa býynyn, ǵylymı-zertteý bazasynyń damýyn, bilim berý men tehnologııalyq serpiliske múmkindikter alady», dep sózin jalǵady Almasadam Sátqalıev.
Atom elektr stansasy – atom ónerkásibin damytýdyń, ındýstrııalyq-ınnovasııalyq progres pen uzaq merzimdi ekonomıkalyq ósýdiń negizgi draıverine aınalatyn strategııalyq joba. Sondyqtan ǵalamat jobanyń jumysy bastalǵan kúndi alty alashqa aq túıeniń qarny jarylǵan kún dep alaqaılaýǵa da bolady.