Taraz qalasyndaǵy «Almaz Medical Group» JShS emhanasynda áıelderge keńes beretin bólimshe ashyldy, dep habarlaıdy Egemen.kz.
Oblys ákimdigi densaýlyq saqtaý basqarmasynyń basshysy Serjan Nazarbektiń aıtýynsha, jańa bólimshe zamanaýı medısınalyq quraldarmen tolyqqandy jabdyqtalǵan. Munda bilikti mamandar qyzmet kórsetedi.
Munda áıelderge ómiriniń barlyq kezeńderinde, sonyń ishinde júktilikke daıyndyq, júktilik barysy jáne bosanǵannan keıingi kezeńde sapaly ári qoljetimdi medısınalyq qyzmet kórsetiledi. Jańa bólimshe áıelder konsýltasııasy alǵashqy medısınalyq-sanıtarııalyq kómekti jańǵyrtý baǵdarlamasy aıasynda ashyldy.
Bólimshede akýsher-gınekologtar, ýltradybystyq zertteý (ÝDZ) mamandary, otbasyn josparlaý jónindegi keńesshiler qyzmet atqarady. Sonymen qatar, bolashaq analarǵa arnalǵan arnaıy mektep, psıhologııalyq jáne zańgerlik kómek te qarastyrylǵan.
Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksine sáıkes, baǵdarlama aıasynda áıelderge kórsetiletin ambýlatorııalyq-emhanalyq deńgeıdegi qyzmetter jetildirilip, olardyń qoljetimdiligi men sapasyn arttyrýǵa basymdyq berilgen. Baǵdarlamanyń negizgi baǵyttary: júktilik kezindegi asqynýlardy erte anyqtaý, prenataldyq skrınıng pen genetıkalyq zertteýler júrgizý, psıhoprofılaktıka, qashyqtan keńes berý jáne patronaj uıymdastyrý. Qıyn ómirlik jaǵdaıǵa tap bolǵan áıelderge psıhologııalyq jáne áleýmettik qoldaý kórsetý de qarastyrylǵan.
Sondaı-aq, reprodýktıvti densaýlyqty saqtaý, túsik jasatýdyń aldyn alý, basqa medısınalyq mekemelermen tyǵyz baılanysta jumys isteý jáne ana men bala ólimin azaıtý maqsatynda naqty sharalar júzege asyrylýda.
«Bul ortalyqtyń ashylýy – áıelderdiń densaýlyǵyna degen qamqorlyqtyń naqty kórinisi. Bolashaq analarǵa kórsetiletin medısınalyq kómektiń sapasy men qoljetimdiligin arttyrý arqyly biz ult saýlyǵynyń negizin qalyptastyramyz»,- deıdi basqarma basshysy.
Taraz