Fransııanyń Avınon qalasynda ótken Halyqaralyq «Off Avignon» festıvali aıasynda álemdik teatr keńistiginde bedeli zor «International Shakespeare Festival Craiova» uıymdastyrǵan erekshe joba júzege asty.
Bul bastama Ýılıam Shekspır shyǵarmalarynyń zamanaýı ınterpretasııasyna arnalǵan úzdik spektaklder men teatr ujymdaryn irikteýdi maqsat etedi. Álemniń ár túkpirinen usynylǵan 18 teatrdyń arasynan iriktelgen eki úzdik ujymnyń biri bolyp Almaty qalasy Memlekettik qýyrshaq teatry tańdaldy. О́ner ordasy Almaty qalasy ákimdiginiń qoldaýymen Ýılıam Shekspırdiń «Romeo men Djýletta» spektaklin qýyrshaq beınesinde sahnalap, kórermenniń ystyq yqylasyna bólendi.
«Biz «Romeo men Djýletta» spektaklin tamashalap, erekshe ásermen shyqtyq. Avınondaǵy festıvaldyń úzdik týyndylarynyń biri dep aıta alamyn. Kózime jas alǵan sátter de boldy. Joǵarǵy deńgeıde sahnalanǵan, rejıssýrasy da, akterlik oıyny da keremet. Bizge osyndaı týyndyny kórýge múmkindik bergenderińiz úshin alǵys bildiremiz!», dep atap ótti «International Shakespeare Festival Craiova» – festıvaliniń uıymdastyrýshysy Andreı Stefaneskıý.
Aıta keteıik, aldaǵy jyly rejısser Dına Jumabaıdyń «Romeo men Djýletta» spektakli qazaq tilinde álemdik sahnaǵa jol tartyp, jańa bıikke kóteriledi. Shekspır murasyn jańa kózqaraspen talqylaıtyn, túrli mádenıetterdi baılanystyratyn halyqaralyq dıalog alańyna aınalǵan Rýmynııadaǵy bul festıval – Almaty qalasynyń Memlekettik qýyrshaq teatry úshin Fransııadaǵy «Off Avignon» jobasynyń tabysty nátıjesi boldy.
Teatr álemindegi úzdik shyǵarmashylyq ujymdarmen baılanys ornatý, kásibı tájirıbe almasý, bolashaqta birlesken jobalardy júzege asyrýǵa múmkindik beredi. Osyndaı kóptegen mańyzdy maqsatty júzege asyrǵan «Off Avignon» festıvali – Almaty qalasy Memlekettik qýyrshaq teatrynyń Fransııa, Anglııa, Germanııa, Italııa syndy eldermen mádenı baılanysyn keńeıtip, shyǵarmashylyq kókjıegin jańa deńgeıge kótergen mańyzdy kópirge aınaldy.