Elimizdiń zertteýshileri qurastyrǵan shaǵyn sý elektr stansasy synaqtan ótti. Qondyrǵy jerasty uńǵymalyq shaımalaý ádisimen ýran óndiretin kásiporynǵa ornatyldy. Stansa tot baspaıtyn bolattan jasalǵan jáne tolyqtaı germetıkalyq, korrozııaǵa tózimdi qaptamamen qorǵalǵan. Qural eritindi júretin qubyrǵa tikeleı ornatylady da, aǵyn qozǵalysynan elektr energııasyn óndiredi, tipti agressıvti ortada da jumys isteı alady, dep habarlaıdy Egemen.kz.
Atalǵan stansany Qyzylorda oblysynda Sátbaev ýnıversıtetiniń ǵalymdary jasap shyqty. Ǵylym jáne joǵary bilim mınıstrliginiń deregine qaraǵanda, bir stansa aǵyn jyldamdyǵy men qubyrdaǵy suıyq kólemine qaraı saǵatyna 7 kVt-qa deıin elektr óndire alady. Ony ónerkásip oryndarynda ǵana emes, sharýa qojalyqtarynda, týrıstik bazalarda, sondaı-aq ózen nemese óndiristik aǵyny bar shalǵaı aýyldarda da qoldanýǵa bolady.
Jobaǵa qatysýshy, qaýymdastyrylǵan professor Rýslan О́tebaev:
«Biz energııany kútpegen jerden ónerkásiptik qubyrlardan óndirýdiń jolyn taptyq. Bul qoldanbaly ǵylymnyń basty mindeti – shyǵyndy resýrsqa aınaldyrý», deıdi.
Elektr óndirýden bólek qondyrǵy qubyrdaǵy zııan dirildi azaıtyp, jabdyqtyń qyzmet merzimin uzartady jáne qaýipsizdigin arttyrady. Stansany ornatý úshin bólek ǵımarat nemese kúrdeli ınfraqurylym qajet emes, bul ony elektr jelisine qosylý múmkindigi shekteýli aımaqtar úshin asa tıimdi etedi.
Ámbebap shaǵyn sý elektr stansasy – ǵalymdardyń ǵylym men óndiristi ushtastyra otyryp, naqty ekonomıkalyq paıda ákeletin ınjenerlik sheshimder jasaı alatynyn dáleldeıtin mysal.