Derekterge súıensek elimizde sońǵy jyldary salynǵan 1200 mekteptiń 217-si – «Keleshek mektepteri» retinde tirkelgen. Onyń 105-iniń qurylysy aıaqtalǵan, al qalǵan 112 mektep 2025 jyldyń sońyna deıin paıdalanýǵa beriledi. Osynshama mektepterdiń salynýy – sońǵy 30 jylda bolmaǵan serpin, bul qalalarda ǵana emes, aýyldyq jerlerde de salyndy. Sondyqtan, bul – tarıhı rekord. «Keleshek mektepterine» qabyldaý – ata-ananyń qalaýymen júzege asyp, kez-kelgen oqýshy óz úıine jaqyn ornalasqan mektepke qujattaryn tapsyryp, bilim ala alady, ıaǵnı barlyq bala úshin qoljetimdi. Endeshe el tańdaýyna ıe bolyp otyrǵan «Keleshek mektepteri» basqa oqý oryndarynan nesimen erekshe? Bul týraly keńinen tarqatyp kóreıik.
Memleket basshysy Joldaýynda ulttyq joba aıasynda salynǵan jańa mektepterdiń ózindik basqarý júıesi bolýy tıis dep aıtqany málim.
Oqý-aǵartý mınıstrligine qarasty Y.Altynsarın atyndaǵy Ulttyq bilim akademııasynyń (UBA) vıse-prezıdenti Anar Táńirbergenovanyń aıtýynsha, atalǵan mektepterdiń oqý baǵdarlamasy da júıeli qurastyrylady.
«Ybyraı Altynsarın atyndaǵy Ulttyq bilim akademııasy aıasynda 105 mekteptiń bazasy quryldy. Ár mektep dırektory týraly tolyq málimetter jınaqtaldy. 2024-2025 oqý jylynan bastap «О́rleý» ulttyq biliktilikti arttyrý ortalyǵymen birlesip, jyl boıyna ádistemelik qoldaý kórsetilip jatyr. Mektep jańadan ashylǵan kezde oqý josparyn qurý, uıymdastyrý jumysyn úılestirý sııaqty jumystar birden qolǵa alyndy. Qazir bul prosester jalǵasyp jatyr», deıdi ol.
«Keleshek mektepterine» pedagogterdi irikteý №57 buıryq negizinde júrgiziledi. Qazirgi ýaqytta Memleket basshysynyń tapsyrmasyna sáıkes, bul mektepterge jeke basqarý júıesi engizilip jatyr. Soǵan baılanysty muǵalimderdi irikteý qalaı bolatyny, mektep basshylaryn qalaı taǵaıyndaý qajettigi, bul mektepterdiń strategııalyq damýy qalaı júzege asatyny ázirlenip jatyr, bul jóninde TAMS konferensııasynda pedagogterge keńinen tanystyrylady.
Pedagog mártebesi týraly zańda kórsetilgendeı qalalyq bolsyn, aýyldyq bolsyn, gımnazııa bolsyn – ár pedagog 3 jylda bir ret biliktiligin memleket qarjylandyrýymen arttyra alady. Osy turǵydan alǵanda «Keleshek mektepteriniń» pedagogteri de, qarapaıym mektep muǵalimderi de birdeı negizde oqytylady.
«Keleshek mektepteriniń» negizgi erekshelikteri mynadaı, onda: tórt sport zaly, keń aýlalary, jaıly synyptary bar, tıptik mekteptermen salystyrǵanda jalpy qurylysy 5-20% kólemdirek. Sondaı-aq IT tehnologııalary men stem-zerthanalary bar. Aǵash óńdeý, tigin úıirmeleri – ıaǵnı, erte kásiptik baǵdar beretin múmkindikter qarastyrylǵan. Al oqýshy orny – 2 000 balaǵa eseptelgen.
Aıta ketken jón, «Keleshek mektepterimen» keminde 3 jyl boıy jumys jasalyp, akkredıtasııa deńgeıine jetkizilip, olardyń tájirıbesi basqa mektepterge masshtabtalady. Qazirgi ýaqytta elimizde 6 800-den astam memlekettik mektep jáne 800-deı jekemenshik mektep bar. Osy mektepterge kezeń-kezeńimen «Keleshek mektepteriniń» tájirıbesi taratylatyn bolady.
Eske salaıyq, bul mektepterdiń ataýy bastapqyda «Jaıly mektep» dep ataldy. О́ıtkeni áýeli ınfraqurylymyn damytý kerek bolǵan. Sóıtip ǵımarattary salynyp, zamanaýı jabdyqtarmen qamtyldy. Al bilim sapasyn jaqsartý kezeńinde «Keleshek mektebi» dep ataldy.
Májilis depýtaty Nurgúl Taý ataýdyń bylaı ózgergeni durys baǵyt dep esepteıdi.
«Iá, «Jaıly mektep» – ol tek komfort, ınfraqurylym, tehnologııa. Biraq keleshekke baǵyttalǵan mektep – bul tek jaıly bolýmen shektelmeýi kerek. Biz keleshekte elimizge paıda ákeletin urpaq tárbıeleýimiz qajet. Sondyqtan jaı ǵana «komfortta otyrǵyzý» emes, sapaly bilim berý, tárbıe berý, kúshti mamandardy tartý basty nazarda bolýy tıis. Mine, «Keleshek mektepteri» osyndaı mazmunmen erekshelenýi kerek dep oılaımyn. Sondyqtan bul ataý da, konsepsııa da óz ornynda», deıdi depýtat.
Sol salynǵan laboratorııalardy, jabdyqtardy, medıatekalardy shań baspaı, balalar úshin qoljetimdi, al muǵalimder tarapynan qoldanylyp, oqytý úderisiniń bir bóligine aınalǵan jaǵdaıda bul mektepter shyn máninde «Keleshek mektepterine» aınalatyny sózsiz.