31 shilde men 10 tamyz aralyǵynda Nıý-Iorkte bedeldi kınofestıval – XXXXVIII «Asian American International Film Festival» ótti. Bıyl festıvaldiń derekti kıno baǵdarlamasynda álemniń túkpir-túkpirinen 12 kartına usynylǵan jáne onyń úsheýi ǵana atalymǵa ilikti.
Otandyq «Prıanıkı dlıa eıo otsa, moego pradeda, eıo deda» atty derekti fılmi «Sikay Tang Critical Lens Award» júldesin jeńip aldy. Bul syılyq kórnekti rejısser jáne montaj sheberi Sıkaı Tangtiń qurmetine atalǵan. Áleýmettik jáne mádenı taqyryptardy tereń zerttelgen derekti kartınalarǵa beriledi. Júlde nebári ekinshi jyl tabystalyp otyrǵanymen, AAIFF derekti baǵdarlamasynyń eń bedeldi marapattarynyń biri sanalady.
Rejısser Alına Mustafınanyń týyndysy Mádenıet jáne aqparat mınıstrliginiń jáne Ulttyq kınony qoldaý memlekettik ortalyǵynyń qoldaýymen túsirgen. «Prıanıkı dlıa eıo otsa, moego pradeda, eıo deda» kartınasynda úsh býyn ókili avtobıografııalyq saparǵa attanady. Áıelder Qazaqstannan Tatarstanǵa, keıin Polsha asyp túp-tamyryn, ata-babasyn izdeıdi.
Bul joba buǵan deıin de halyqaralyq deńgeıde baǵalanǵan. Týyndynyń Pýsan halyqaralyq kınofestıvalinde álemdik premerasy, Týrın kınofestıvalinde eýropalyq premerasy ótti, «Bastaý» festıvalinde (Qazaqstan) «Úzdik debıýt» júldesin aldy, Tegerandaǵy «Cinema Verite» festıvalinde «Úzdik fılm» Gran-prıin ıelendi. Sondaı-aq «Bolzano Film Festival Bozen» (Italııa) jáne «ORAI Festival» (Abaı, Qazaqstan) arnaıy kórsetilimderine usynyldy.
Aıta keteıik, AAIFF 1978 jyldan beri jyl saıyn ótkizilip keledi. Azııalyq jáne Azııa-amerıkalyq kınematografıster úshin mańyzdy alań sanalady. Bul festıval álemge erekshe oqıǵalardy kórsetip, jańasha kórkemdik kózqaras qalyptastyrady.