El sarapshylary Prezıdent Qasym-Jomart Toqaevtyń Memleket basshysy retindegi syrtqy saıası baǵytyna tereń ári kópqyrly taldaý jasady. Saraptamalyq materıaldar «Prezıdent Toqaevtyń dıplomatııasy» dep atalatyn ujymdyq monografııada toptastyrylǵan. Jańa jınaq Prezıdent janyndaǵy Qazaqstannyń strategııalyq zertteýler ınstıtýtynda (QSZI) kópshilikke tanystyryldy.
Avtorlar Prezıdent dıplomatııasynyń úsh negizgi qaǵıdatyna, sondaı-aq elimizdiń syrtqy saıasatyn álemdik saıasattaǵy kún saıyn qubylyp otyratyn ahýalǵa utymdy ári strategııalyq beıimdeý tetikterine basty nazar aýdarǵan. Sondaı-aq Aýǵanstan men Ýkraınadaǵy halyqaralyq daǵdarystarǵa, jahandyq klımattyq qaýipterge jáne qazirgi dıplomatııanyń kontekstin aıqyndaıtyn syn-qaterler de taldanǵan. Basylym avtorlary – Erkin Tuqymov, Sanat Kóshkimbaev, Bolat Áýelbaev, Erbolat Seıilhanov, Daýren Áben jáne Ásel Áben syndy halyqaralyq qatynastar men jahandyq ekonomıka salasyndaǵy jetekshi sarapshylar.
Kitaptyń tanystyrylýynda sóz sóılegen QSZI dırektorynyń orynbasary Alýa Joldybalına: «Prezıdent Toqaevtyń dıplomatııasy – bul tek syrtqy saıası baǵyt qana emes. Bul elimizdiń halyqaralyq arenadaǵy bedelin nyǵaıtatyn ári elimizdiń jahandyq úderisterdegi jaýapty áriptes retindegi kemeldigin aıqyn kórsetetin keshendi strategııalyq kózqaras», dep atap ótti.
Jalpy, basylymda eldiń ishki saıası reformalary men syrtqy saıası baǵyty arasyndaǵy ózara baılanys erekshe sıpattalady. Bul Prezıdent Q.Toqaevtyń dıplomatııalyq strategııasyn keńirek ári kópqyrly kontekste qarastyrýǵa múmkindik beredi. Monografııa avtorlarynyń biri, Qazaqstan Respýblıkasy Prezıdentiniń Aýǵanstan jónindegi arnaıy ókili Erkin Tuqymov atalǵan monografııany ázirleýge túrtki bolǵan sebepterdi aıtyp ótti.
«Sheteldik áriptestermen, jastarmen, stýdenttermen kezdesýler barysynda keıingi jyldardaǵy elimizdiń syrtqy saıasatynyń mazmunyna qatysty suraqtar jıileı tústi. Osyǵan baılanysty júıeli analıtıkalyq eńbekke degen qajettilik paıda boldy. Bizdiń bul jumysymyz tek sarapshylarǵa ǵana emes, keń aýdıtorııaǵa da paıdaly derekkózine aınalatynyna senemiz», dedi E.Tuqymov.
Al basylymnyń birlesken avtory, QSZI bas ǵylymı qyzmetkeri Sanat Kóshkimbaev Q.Toqaev dıplomatııasy tek prezıdenttik tájirıbeniń ǵana emes, sonymen qatar biregeı kásibı joldyń nátıjesi ekenin aıtady.
Monografııa halyqaralyq qatynastar salasynyń mamandaryna, saıasattanýshylarǵa, stýdentterge, dıplomattarǵa, sondaı-aq Qazaqstannyń qazirgi álemdegi strategııalyq ornyna qyzyǵýshylyq tanytqan barsha oqyrmanǵa arnalǵan.