Sý resýrstary jáne ırrıgasııa mınıstrligi qurylǵaly beri halyqaralyq áriptestermen 4 kelisim jáne 20 memorandýmǵa qol qoıdy. Memleket basshysynyń tapsyrmalaryn oryndaý maqsatynda sala mınıstrligi Fransııa, Germanııa, Nıderlandy, Ispanııa, Japonııa jáne QHR sııaqty elderdiń halyqaralyq uıymdarymen, sý salasy mekemelerimen, damý agenttikterimen jáne kompanııalarymen áriptestik ornatty. Sý salasyn damytýǵa granttar túrinde 14 mln dollardan astam qarjy tartylǵan, dep habarlaıdy Egemen.kz atalǵan vedomstvonyń málimetine silteme jasap.
Byltyr jeltoqsan aıynda Sý resýrstary jáne ırrıgasııa mınıstrligi, Fransııanyń damý agenttigi (AFD) jáne Fransııanyń Geologııalyq jáne taý-ken zertteý bıýrosy (BRGM) Balqash kólin saqtaý jóninde úshjaqty yntymaqtastyq kelisimine qol qoıdy. Kelisim aıasynda kól basseınin zertteý jáne Balqashty saqtaý boıynsha master-jospar ázirleý úshin 1,35 mln eýro kólemindegi grant qarastyrylǵan.
Bıylǵy maýsym aıynda Almaty oblysynyń Balqash aýdanynda otandyq ǵylymı ınstıtýttar men jergilikti atqarýshy organdardyń qatysýymen Sý resýrstary jáne ırrıgasııa mınıstrligi men Fransýz ǵylymı konsorsıýmy uıymdastyrǵan aýqymdy dalalyq ekspedısııa ótti.
Osy jyly naýryz aıynda Qazaqstan men Qytaıdyń sý sharýashylyǵy vedomstvolary ózara túsinistik jáne yntymaqtastyq týraly memorandýmǵa qol qoıdy. Qujatta sýdy utymdy ári turaqty paıdalaný, zamanaýı tehnologııalardy engizý, sondaı-aq tájirıbe almasý jáne kadrlardy birlesip daıarlaý kózdelgen.
Bıyl Qytaıda otandyq sý salasynyń 121 mamany biliktiligin arttyrý kýrstarynan ótip jatyr. Kelesi jyly bul kórsetkish shamamen 200 adamǵa jetpek.
Qazaqstan men Nıderlandy sý tasqynyna qarsy kúres jáne sý salasy mamandaryn daıarlaý baǵytynda memorandýmdarǵa qol qoıdy. Birinshi qujatta tasqyn sýlardy retteý jáne paıdalaný tájirıbesimen almasý, sondaı-aq ózen aǵystaryn basqarýda Nıderlandy tájirıbesin zerdeleý qarastyrylǵan. Ekinshi memorandým Delft sý resýrstaryn oqytý ınstıtýtymen (IHE Delft) jasalyp, sý salasynda mamandar daıarlaýdy, ǵylym jáne ınnovasııalyq tehnologııalar salasyndaǵy yntymaqtastyqty qamtıdy.
Osy kelisimder aıasynda nıderlandtyq sarapshylar elimizde sý tasqyny qaýpin basqarý boıynsha oqytý semınarlaryn ótkizdi. Sondaı-aq Qazaqstanda sý tasqynyn boljaý jáne modeldeý júıesin qurý úshin Delft-FEWS sıfrlyq platformasy qoldanylyp jatyr. Bıyl qazan aıynda Nıderlandynyń Astanadaǵy Elshiligimen birlesip gıdrologııalyq modeldeýdi baǵdarlamalyq qamtamasyz etý boıynsha trenıng ótkizý josparlanyp otyr.
«Japonııa Úkimetimen elimizde bógetterdi keshendi basqarý arqyly sý tasqynyna qarsy sharalardy jetildirýge 2 mln AQSh dollary kóleminde qarjy bólý týraly kelisim jasaldy. Al Ispanııa Úkimeti Batys Qazaqstandaǵy jerasty sý ken oryndaryn zertteýge grant bólýdi josparlap otyr. Mundaı halyqaralyq kelisimder Memleket basshysynyń tapsyrmalaryn sapaly jáne ýaqytyly oryndaýǵa baǵyttalǵan», dedi Sý resýrstary jáne ırrıgasııa mınıstri Nurjan Nurjigitov.