Búgin Prezıdent ustazdardyń Respýblıkalyq tamyz konferensııasyna qatysyp otyr. Qasym-Jomart Toqaev Tamyz konferensııasynyń plenarlyq otyrysynda sóılegen sózinde balalardyń kóp ýaqytyn áleýmettik jelide ótkizetinin, osy turǵyda pedagogterge artylatyn júk qandaı ekenin atap ótti, dep jazady Egemen.kz.
«Balalar ómirlik daǵdynyń kóbin mektepte meńgeredi. Olar munda tártipke baǵynyp, júrip-turý erejeleri men ádep normalaryn saqtaýdy úırenedi. Sondyqtan mektep ózara qurmet pen janashyrlyqqa toly úılesimdi qoǵamnyń úlgisi bolýǵa tıis. Balalardy jaýapkershilikke baýlyp, olarǵa kez kelgen árekettiń saldary bolatynyn túsindirý mańyzdy. «Zań men tártip» qaǵıdaty tárbıe jumysynyń ajyramas bólshegine aınalýǵa tıis. Eń basty mindet – osy tujyrymdamanyń mán-mańyzyn túsinikti tilde, ozyq pedagogıkalyq ádister arqyly óskeleń urpaqtyń sanasyna sińirý.Bul iske dırektordyń tárbıe jumystary jónindegi orynbasary, synyp jetekshileri men mektep psıhologterinen bólek, barsha ustazdar qaýymy atsalysýǵa tıis. О́ıtkeni bul – memlekettik mańyzy bar mindet. Balalardy áleýmettik keselderden qorǵaý úshin olardyń synı oılaý qabiletin ushtaý qajet. Jas urpaqtyń kóp ýaqytyn Internet pen áleýmettik jelilerde ótkizetini jasyryn emes. Olar jalǵan ıdeıalar men minez-qulyqty buzatyn teris tárbıeniń yqpalyna ońaı túsýi yqtımal. Sol sebepti ár pedagog balalardy óz emosııasyn ustaýǵa, kez kelgen nársege nemese jaǵdaıǵa baıyppen qarap, durys sheshim qabyldaýǵa úıretýi kerek.Nashaqorlyq pen lýdomanııa, turmystyq zorlyq-zombylyq, býllıng jáne buzaqylyq syndy zııandy ádettermen kúresýde muǵalimder aıryqsha ról atqarady. Jas urpaq arasyndaǵy narkotızmge qarsy is-qımylǵa búkil qoǵam bolyp jumylý kerek. Men bul týraly jaqynda Qaýipsiz Keńesiniń otyrysynda aıttym. Biraq, eń bastysy, ártúrli stımýlıatorlarmen áýestený, tipti ol zııansyz bolsa da, túbi jarǵa jyǵatynyn balalar men jastarǵa túsindirý qajet. Zııandy zattardy tutyný nemese vırtýaldy oıyndar arqyly shyndyqtan ajyrap, qııalǵa erik berý adamdy aınalasyna jeksuryn qylyp, qoǵamnan shettetedi. Shyn máninde, mundaı jandar óz bolashaǵyna balta shabady. Olar jaqsy jumys taýyp, berekeli otbasyn qurý múmkindiginen aıyrylady. О́ziniń darynyn kórsetip, bıik maqsattarǵa jete almaıdy», dedi Prezıdent.