Respublica partııasynan saılanǵan Májilis depýtaty Ekaterına Smolıakova jumys saparymen Shyǵys Qazaqstan óńirinde bolyp, týrızm salasynyń qazirgi jaǵdaıyn zerdeledi. Halyq qalaýlysy Qatonqaraǵaı men Úlken Naryn aımaqtarynda jergilikti turǵyndar jáne kásipkerlermen júzdesip, óńirdiń tabıǵı-týrıstik áleýetimen tanysty, dep jazady Egemen.kz.
Sapar barysynda depýtat Buqtyrma sý qoımasynyń jaǵalaýyn aralap, oblystyq Kásipkerler palatasynyń týrızm keńesimen kezdesip, saladaǵy qordalanǵan máselelerdi talqylady. Olardyń qatarynda óńirdi damytýǵa arnalǵan bas jospardyń joqtyǵy, elektr qýatynyń jıi ajyraýy, ınternet pen baılanys sapasynyń tómendigi, ınfraqurylymnyń álsizdigi jáne tabıǵatty aıalaý mádenıetiniń jetkiliksizdigi bar. Bul túıtkilder tabıǵı baılyǵy mol aımaqtaǵy týrızmniń órkendeýine eleýli kedergi keltirip otyr.
«Kásipkerler ınvestısııa quıýǵa ázir, týrıster kelýge yntaly. Biraq qaı jerde qandaı qurylys júrgiziletini, qandaı nysandar josparlanǵany belgisiz. Jaryq jıi sónedi, ınternet sapasy nashar. Máselen, Úlken Naryndaǵy vızıt-ortalyqta týrıster arnaıy izdeıtin jergilikti bal, pantokrın, qaıyń qabyǵynan nemese sazdan jasalǵan buıymdar múlde joq. Al Altaıǵa kelgen qonaq sapardan estelik, syılyqsyz ketkisi kelmeıdi. Mundaı ónimder – óńirdi tanytýdyń mańyzdy quraly», dedi depýtat.
Ekaterına Smolıakovanyń aıtýynsha, memleket tarapynan túrli baǵdarlamalar men qoldaý sharalary qarastyrylǵanymen, Shyǵys Qazaqstannyń týrızm áleýeti tolyq paıdalanylmaı otyr. Sońǵy tórt jylda elimizdiń ishki jalpy ónimindegi týrızmniń úlesi 3,7%-dan 3,2%-ǵa tómendegen. Bul kórsetkish – álemdik ortasha deńgeıden úsh esedeı az, sondaı-aq klımaty uqsas kórshi memleketterden de artta qalyp keledi.
«Dúnıejúzinde týrızm – jumys oryndarynyń 10 paıyzy, eksporttyń 30 paıyzy, ınvestısııanyń 7 paıyzy. Bizde de tabıǵı jáne mádenı baılyq jetkilikti. Tek júıeli qadamdar men sapaly serpilis qajet», dep túıindedi halyq qalaýlysy.
Buǵan deıin depýtat Mańǵystaý jáne Almaty oblystaryndaǵy týrıstik aımaqtardy aralap, ınfraqurylym, qyzmet kórsetý sapasy, ekologııa jáne týrızmdi ilgeriletý máselelerin kótergen edi. Shyǵystaǵy jumys sapary da jalǵasyp, aldaǵy kúnderi turǵyndar men kásipkerlerdiń usynystary tyńdalady. Jınalǵan pikirler men usynystar Parlamentte talqylaýǵa usynylmaq.