Kartasyn naızamen syzǵan babalardyń bizge qaldyrǵan amanatyn kúzetý – armen qorǵalatyn abyroıly mindet. Týǵan jerdiń tynyshtyǵyn qadaǵalaý, árbir qadamyna qyraǵylyq tanytyp, memlekettiń berik qalqany bolý – ár sarbazdyń basty boryshy. Osynaý mártebeli qyzmettiń mańyzyn túsindiretin mysaldar Túrkistan oblysy, Qazyǵurt pen Saryaǵash aýdandaryndaǵy polkovnık Asqar Bolatov basqaratyn shekara zastavalarynyń qyzmetinen anyq ańǵarylady.
Ulan-ǵaıyr jerimizdiń shekarasy on úsh myń shaqyrymnan asady. Onyń ishinde tek О́zbekstanmen aradaǵysy 2300 shaqyrymdy quraıdy. Bul – qyraǵylyqty, sergektikti talap etetin aýqymdy aýmaq. Árbir kún, árbir saǵat saıyn shekara boıynda jaýyngerlerimiz kirpik qaqpaı qyzmet atqarady.
Polkovnık Asqar Bolatov basqarmanyń О́zbekstanmen shektesetin eki júz shaqyrymǵa jýyq aýmaqty kúzetedi. Onyń júz otyz shaqyrymy qurlyqpen, jetpis shaqyrymy ózen boıymen ótedi. Bul aýmaqta avtomobıldik, temirjoldyq ótkizý pýnktteri men júk tasymalyna arnalǵan beketter ornalasqan.
«Bizdiń qatarǵa kelgen jigitterdiń bári elge degen patrıottyq sezimmen qyzmet etedi. Bul – ata-babamyzdan amanatqa qalǵan jer. Naızanyń ushymen, bilektiń kúshimen qorǵap ketken Otandy biz senimmen kúzetip otyrmyz. Ár salanyń qıynshylyǵy bolady ǵoı, shekarashylarda bul mindettiń júgi tipti aýyr. Biraq bizdiń sarbazdar soǵan tótep berip, qyzmetin abyroımen atqaryp júr», deıdi polkovnık.
Onyń sózinen árbir áskerıdiń boıyndaǵy maqtanysh pen jaýapkershilikti ańǵarýǵa bolady. Asqar Bolatov týǵan jeriniń ózi shekaraǵa jaqyn bolǵandyqtan, bala kezden ofıser bolýdy armandaǵan. Búginde sol armany oryndalyp, úlken ujymǵa basshylyq etip otyr.
A.Bolatovtyń basqaratyn aýmaǵy taýly-shatqaldy bolǵandyqtan, sarbazdardyń bir toby el shebin atpen kúzetedi. Kánigi Keıki mergender sekildi olar da pıǵyly jaman dushpanǵa qapııada qarsy turady. Tańnyń atysy, kúnniń batysy tulpardyń tuıaǵy tynbaıdy, kúzet shebi úzilmeıdi. Sarbazdar tóbeniń tasasy men ár saıdyń yǵyna muqııat nazar aýdarady. Aýylda ósken, atqa úırengen jigitter úshin munyń bári – úırenshikti jumys
Al Syrdarııa boıyndaǵy «Birlik» zastavasynda qurlyqpen birge ózen de baqylaýda ustalady. Arnaıy katerler arqyly shekarashylar táýligine birneshe márte ózendi sholyp shyǵady. Munda kelisimshart negizinde tájirıbeli mamandar eńbek etedi.
Osylaısha, Asqar Bolatov basqarǵan bólimshelerdiń jiti eńbeginiń arqasynda elimizdiń kúńgeı betine kóleńke túsip turǵan joq. Shekarashylar táýlik boıy kirpik qaqpaı kúzette turady. Biz shyrt uıqyda jatqanda olardyń árbir qadamy el qaýipsizdigine kepil bolyp otyr.
Iá, bul júıeli jumys ońaı qalyptasyp ketken joq. Shekaramyzdyń shegendelýi –birneshe dıplomatııalyq kelisimderdiń nátıjesinde. Eń alǵash 1992 jyldyń 18 tamyzynda Qazaqstan shekara áskerleri qurylǵan edi. Keıin túrli kezeńderden ótip, 1999 jyly UQK quramyndaǵy Shekara qyzmeti bolyp qaıta jasaqtaldy. 2013 jyly «Memlekettik shekara týraly» zań qabyldanyp, quqyqtyq negizi nyǵaıdy. Búginde elimizdiń shekarasy – álemdegi eń uzyn qurlyqtyq mejelengen aýmaqtyń biri.
Osy aýqymdy aýmaqty qorǵap otyrǵan sarbazdar men ofıserlerdiń eńbegi – el tynyshtyǵynyń kepili. Polkovnık Asqar Bolatov aıtqandaı, ata-babamyz amanat etken jerdi kúzetý – árbir shekarashynyń júregindegi sert bolyp qala bermek.