Jańa kásibı mereke – Qazaqstan Respýblıkasynyń Kásipkerler kúni belgilendi, dep habarlaıdy Egemen.kz QR Ekonomıka mınıstrligine silteme jasap.
Qazaqstanda 29 qazannan bastap kásibı mereke — Kásipkerler kúni atap ótiledi. Bul týraly Qazaqstan Respýblıkasy Eńbek jáne halyqty áleýmettik qorǵaý mınıstrliginiń tıisti buıryǵyna 2025 jylǵy 30 shildede qol qoıylyp, bekitildi.
Mereke kúniniń dál osy kúnge túsýi mańyzdy tarıhı oqıǵamen baılanysty: 2015 jylǵy 29 qazanda Qazaqstan Respýblıkasynyń Kásipkerlik kodeksi qabyldanǵan edi. Bul kodeks kásipkerlik, ınvestısııalar, básekelestik jáne memlekettik baqylaý salalaryndaǵy negizgi zańnamalyq aktilerdi biriktirip, bıznesti qoldaý jónindegi biryńǵaı memlekettik saıasattyń bazalyq qaǵıdattaryn qalyptastyrdy.
Búginde elde 2 mıllıon 300 myńnan astam bıznes sýbektisi tirkelgen. Kásipkerlerdi qoldaý ekonomıkalyq saıasattyń basym baǵyttarynyń biri bolyp qala bermek. Tek osy jyldyń ózinde 2 myńnan astam jobaǵa 288 mıllıard teńgeden astam sýbsıdııa berildi, sondaı-aq 737 joba boıynsha 61 mıllıard teńgege kepildik berildi. 9 myńǵa jýyq kásipker arnaıy oqýdan ótti.
2025 jyly shaǵyn jáne orta bıznesti qoldaýǵa 270 mıllıard teńgeden astam qarjy baǵyttalmaq. «О́rleý» jeńildetilgen nesıe berý baǵdarlamasy iske qosyldy, nesıe mólsherlemesi 12,6%. Qoldaýdyń jalpy kólemi 750 mıllıard teńgeni quraıdy, onyń 300 mıllıardy — «Damý» qorynyń, al 450 mıllıardy — bank resýrstarynyń esebinen. Qazirdiń ózinde 200 mıllıard teńgege jýyq 400 joba qarjylandyryldy.
Bıznes ókilderiniń habardarlyǵyn arttyrý maqsatynda «Sıfrlyq bıznes kartasy» jobasy iske asyrylady. 100-den astam qoldaý sharalaryn qamtıtyn Reestr bekitildi. Sonymen qatar, «Báıterek» holdıngi qoldaý sharalaryn qamtıtyn «Bgov» aqparattyq júıesi men «eGov Business» qosymshasy biriktirildi. Bul qosymshany 71 myńnan astam paıdalanýshy 2,3 mıllıon ret qoldanǵan.