Bıylǵy 7 aıda ashyq júk vagondaryn shyǵarý 5 esege, al jaıdaq platformalar shyǵarý 2,2 esege artqan. Bul týraly Úkimet otyrysynda ónerkásip jáne qurylys mınıstri Ersaıyn Naǵaspaev habarlady, dep jazady Egemen.kz.
Temirjol ónerkásibi elimizdegi mashına jasaýdyń jalpy kóleminiń 13%-yn qurap otyr. О́tken jyly temirjol ónimderin shyǵarý 25%-ǵa ósip, 600 mıllıard teńgege jetken.
«Keıingi bes jylda ulttyq operatordyń vagon parkin jańartýdy iske asyrý nátıjesinde osy salada ınvestısııalyq belsendilik baıqalyp jatyr. Nátıjesinde otandyq naryqqa Wabtec, Alstom, Stadler sııaqty álemniń jetekshi brendteri keldi», dedi mınıstr.
Búginde saladaǵy 60-tan astam kásiporynda, 8 myńǵa jýyq adam jumys isteıdi.
Sondaı-aq, Qazaqstan temirjol tehnıkalary men oǵan arnalǵan bólshekterdi shyǵarý óndirisin arttyryp keledi.
Jańa óndiristik oryndar Astana, Ekibastuz, Semeı qalalarynda jáne Atyraý oblysynda qurylyp jatyr. Máselen, bıyl qańtar aıynda Astanada jylyna júzge deıin jolaýshylar vagonyn shyǵaratyn «Stadler Qazaqstan» zaýyty, Atyraý oblysynda «Teksol Trans» JShS-nyń jylyna 6 myń júk vagony men sısterna shyǵaratyn zaýyty iske qosyldy
«Shyǵarylǵan vagondar 2030 jylǵa deıin kelisim-shart aıasynda «Qazaqstan temir joly» ulttyq kompanııasyna jetkiziletin bolady. Jyl sońyna deıin alǵashqy 51 vagon paıdalanýǵa beriledi. Atyraýda jergilikti óndiris úlesin arttyrý maqsatynda ınvestor bólshek quıý zaýytyn salýdy bastady. Onda jylyna 60 myń tonnaǵa deıin detaldar quıylmaq. Zaýyttyń iske qosylýy 2027 jylǵa josparlanǵan», dedi Ersaıyn Naǵaspaev.