Qaraǵandy oblysy, Nura aýdanynyń Ahmet aýylynda órt sóndirý beketi paıdalanýǵa berildi. Endi munda tórt qutqarýshy táýlik boıy kezekshilik atqarady, dep habarlaıdy Egemen.kz.
Saltanatty is-sharaǵa Qazaqstan Respýblıkasy Tótenshe jaǵdaılar vıse-mınıstri, general-maıor Ramıl Kamalov, aýdan basshylyǵy men jergilikti turǵyndar qatysty.
Jańadan ashylǵan beket «NýrıD» JShS aýmaǵynda ornalasqan. Onyń qyzmetin qamtamasyz etý úshin Qaraǵandy oblystyq Tótenshe jaǵdaılar departamenti ZIL AS-4-40 markaly órt sóndirý kóligin berdi. Arnaıy tehnıka órt sóndirýge qajetti zamanaýı jabdyqtarmen tolyq jabdyqtalǵan.Sonymen qosa, beket 10 dana arqaǵa asatyn órt sóndirgishpen, erikti órt sóndirýshilerge arnalǵan arnaıy qorǵanysh kıimi bar úsh jıyntyqpen, eki akkýmýlıatorly joǵary qysymdy qurylǵymen jáne eki jıyntyq jaýyngerlik kıimmen qamtamasyz etildi. Qyzmetkerler úshin dıspetcherlik bólme men demalys orny qarastyrylǵan.
Ashylý rásiminde memleket pen bıznestiń seriktestigine de nazar aýdaryldy. Ahmet aýyly ákimi apparaty men «NýrıD» JShS arasynda yntymaqtastyq týraly memorandýmǵa qol qoıyldy.
О́rt sóndirý beketi «Aýyl qutqarýshylary» respýblıkalyq baǵdarlamasy aıasynda ashyldy.