Astanadaǵy «BIG Shanhaı» saýda úıindegi órt kóp adamnyń turmysyna salmaq saldy. 18 shildede bolǵan apattan keıin júzdegen kásipker kúnkóris kózinen aıyrylyp, qazir qaryzdyń astynda qaldy, dep jazady Egemen.kz.
Resmı málimetke súıensek, barlyǵy 333 adam zardap shekken. Sonyń ishinde 205 kásipkerdiń bankter men shaǵyn nesıe uıymdaryna qaryzy bar eken. Qaryzdyń jalpy somasy az emes, 2,5 mlrd teńge. Onyń ishinde 2 mlrd teńgesi bankterge, al 480 mln teńgesi shaǵyn nesıe uıymdaryna tıesili.
Bul másele qoǵam nazaryn aýdarǵannan keıin depýtattar Qarjy naryǵyn retteý agenttigine saýal joldady. Jaýap retinde qarjy uıymdary jaǵdaıdy túsinip, kásipkerlerge jeńildik jasaýǵa kelisken.
Nátıjesinde, 78 kásipkerdiń qaryzy boıynsha 1,8 mlrd teńge alty aıǵa shegerildi. Iаǵnı, olar osy ýaqyt aralyǵynda nesıe tólemeıdi. Biraq bári birdeı bul kómekke kelise qoıǵan joq. 65 kásipker jalpy somasy 581 mln teńge bolatyn jeńildik sharasynan bas tartqan. Qalǵan kásipkerlerdiń máselesi jeke-jeke qaralyp jatyr.
Eske sala keteıik, «BIG Shanhaı» 2014 jyly ashylyp, 90-nan asa býtık jumys istep turǵan edi.