Úkimet aýyl turǵyndaryn aýyzsýmen qamtýǵa baǵyttalǵan jobalardy jedeldetýdi tapsyrdy, dep jazady Egemen.kz.
Vıse-premer Qanat Bozymbaevtyń tóraǵalyǵymen ótken keńeste Memleket basshysynyń halyqty 100 paıyz aýyzsýmen qamtamasyz etý jónindegi tapsyrmasyn oryndaý barysy talqylandy. Jıynǵa salalyq mınıstrlikterdiń jáne óńir ákimdikteriniń basshylary qatysty.
Mınıstrlik málimetine sáıkes, sý resýrstary jáne ırrıgasııa mınıstrligi tapsyrys berýshi retinde bıyl 20 jobany iske asyrýda. Onyń segizin jyl sońyna deıin aıaqtaý josparlanǵan. Nátıjesinde 149 aýyldaǵy jaǵdaı jaqsaryp, tórt eldi mekenniń 1,5 myń turǵyny alǵash ret ortalyqtandyrylǵan sýǵa qosylady. Sondaı-aq bıyl 49 aýylǵa (40 myńnan astam turǵynǵa) sý júıesi tartylady.
Qazir Soltústik Qazaqstan, Almaty jáne Aqmola oblystarynda taǵy alty jobanyń jobalyq-smetalyq qujattamasy ázirlenip jatyr.
Vıse-premer Qanat Bozymbaev atqarylǵan jumystardyń qarqynyn synǵa alyp, keıbir óńirlerdiń artta qalǵanyn atap ótti. Onyń aıtýynsha, jalpy el boıynsha 269 joba qolǵa alynǵanymen, birqatary nebári 50 paıyz ǵana oryndalǵan.
«Abaı, Aqmola, Qaraǵandy, Pavlodar, Soltústik Qazaqstan, Túrkistan oblystarynda jáne Almaty qalasynda artta qalý baıqalady. Abaı oblysynda jeti joba, onyń ishinde Semeıdegi úsh nysan boıynsha jumys áli bastalǵan joq. Alda eki aıdan keıin sýyq túsedi. Keler jylǵa ótetin joba bolmaýy tıis. Barlyq nysan bıylǵy jyly tolyq tapsyrylýy qajet. Bul másele meniń jeke baqylaýymda», dedi Bozymbaev.
Keńes qorytyndysy boıynsha Úkimet mınıstrlikterge turaqty monıtorıng júrgizýdi tapsyrdy. Al ákimdikterge jergilikti bıýdjet esebinen qarjylandyrýdy qamtamasyz etip, bıyl josparlanǵan barlyq nysandy ýaqytyly paıdalanýǵa berýdi mindettedi.