Sıfrlyq damý mınıstrligi qoǵamda taralyp jatqan WhatsApp, Telegram jáne basqa da sheteldik messendjerlerdi qoldanýǵa tyıym salynatyny týraly aqparattyń shyndyqqa janaspaıtynyn habarlady, dep jazady Egemen.kz.
Mınıstrlik málimetinshe, Aitu messendjerin engizý bastamasy tek ortalyq jáne jergilikti memlekettik organdarǵa, sondaı-aq kvazımemlekettik sektor uıymdaryna qyzmettik kommýnıkasııa úshin ǵana usynylady. Ol memlekettik qyzmetkerler tek jumys barysynda paıdalanatyn aqparatpen qaýipsiz almasýdy qamtamasyz etý maqsatynda qoldanylady. «Aitu qyzmettik hat almasýdyń, jumys chattarynyń, jedel habarlamalardyń jáne memlekettik sıfrlyq platformalarmen ózara árekettesýdiń negizgi quralyna aınalady. Onyń basty artyqshylyǵy – barlyq serverler Qazaqstan aýmaǵynda ornalasqan, bul derekterdi qorǵaý talaptaryna sáıkes keledi jáne júıeni memlekettik organdar úshin senimdirek etedi. Aitu sheteldik messendjerlerdi azamattardyń jeke ómirinde almastyrmaıdy jáne oǵan «kedergi keltirmeıdi», ol tek memlekettik sektordaǵy jumys prosesteri úshin qorǵalǵan arnany qamtamasyz etedi», delingen habarlamada.