«Astana Opera» teatrynyń ónerpazdary Qytaıda ótken balet ártisteriniń birinshi halyqaralyq baıqaýynan jeńispen oraldy. Ásirese jetekshi solıst Dıas Qurmanǵazy «Úzdik oryndaý» atalymynda top jarsa, jas horeograf Sultanbek Ǵumar «Úzdik horeografııa» atalymynda júldeger atandy.
Bul baıqaýǵa 10 elden 400-den astam ónerpaz qatysqan. Olardyń ónerin álemge tanymal Sıao Sýhýa (Qytaı), Vıvıana Dýrante (Italııa), Manýel Legrı (Fransııa), Patrık de Bana (Germanııa), Vladımır Malahov (Reseı), Eldar Alıev (Ázerbaıjan) sekildi balet maıtalmandary sarapqa salǵan.
Aıtalyq, Shenıan sahnasynda Dıas Qurmanǵazy ónerdegi seriktesi Kamıla Shahmanovamen birge P.Chaıkovskııdiń «Shelkýnchık», R.Drıgonyń «Talısman» baletterinen úzindi qoıdy. Sondaı-aq Sultanbek Ǵumardyń qoıylymyndaǵy «Ańsaý» nómirin oryndady. Sońǵy qoıylym baǵdarlamanyń kórki boldy. Sebebi qazylar alqasy qoıylymdaǵy plastıkalyq sheshimderdiń biregeıligin joǵary baǵalaǵan.
Jas horeograf Sultanbek Ǵumar mundaı qoıylymdy qoıý týraly usynys áriptesteri – Dıas Qurmanǵazy men Kamıla Shahmanovadan túskenin aıtty.
– Olardyń usynysyn birden qabyl aldym. Sodan úsheýmiz qyzý jumysqa kiristik. Bes kún ishinde «Ańsaý» dep atalǵan jańa nómirdi jasap shyqtyq. Onyń mýzykalyq negizi «HasSaq» etno-folklorlyq tobynyń attas kompozısııasy boldy. Qoıylymǵa osy áýen zor serpin berdi. Bul mýzykany alǵash estigende qatty unatyp, oǵan mindetti túrde bı qoıýym kerek dep oıladym. Endi, mine, sol oıymyzdy sahnada júzege asyrdyq, – dedi ol.
Baıqaýda qazylar alqasynyń músheleri horeografııalyq qoıylymnyń ulttyq boıaýymen birge «HasSaq» mýzykasynyń ózgeshe sazdylyǵyna tánti bolǵan. Sonymen qatar Sultanbek Ǵumar osy óner báıgesine qatysýǵa qoldaý kórsetken Mádenıet jáne aqparat mınıstrligi men «Astana Opera» basshylyǵyna, balet trýppasynyń kórkemdik jetekshisi Altynaı Asylmuratovaǵa rızashylyǵyn bildirdi.