Memleket basshysy Qasym-Jomart Toqaevtyń tapsyrmalaryn oryndaý aıasynda elimizde jańa gaz ken oryndary ónerkásiptik paıdalanýǵa engizildi. Bul týraly Energetıka mınıstri Erlan Aqkenjenov habarlady, dep jazady Egemen.kz.
Prezıdent óz Joldaýynda gaz salasyndaǵy basty mindetterdiń biri – qýattylyqty arttyrý jáne gaz tasymaldaý baǵyttaryn ártaraptandyrý ekenin atap ótken bolatyn. Úkimet úshin halyqty jáne ekonomıkany turaqty gazben qamtý – negizgi basymdyqtardyń biri bolyp qala beredi.
Mınıstrdiń aıtýynsha, qazirgi kezeńdegi basty mindet – resýrstyq bazany keńeıtý jáne óńdeýdi damytý. Bul baǵytta «2029 jylǵa deıingi gaz salasyn damytýdyń keshendi jospary» júzege asyrylyp jatyr.
Erlan Aqkenjenovtiń dereginshe, elimizde Rojkovskoe, Úriktaý Shyǵys jáne Anabaı ken oryndary ónerkásiptik paıdalanýǵa berildi. Sondaı-aq iri gaz óńdeý zaýyttarynyń qurylysy qarqyndy júrip jatyr. Olar Qashaǵan, Qarashyǵanaq jáne Jańaózen ken oryndarynda salyný kózdeldi.
Kaspıı qaırańyndaǵy Qashaǵan ken ornynda qýattylyǵy jylyna 1 mlrd m³ bolatyn gaz óńdeý zaýytynyń qurylysy bastalǵan. Joba 2026 jyly aıaqtalýy tıis.
Budan bólek, bıyl mamyr aıynda «Beıneý – Bozoı – Shymkent» magıstraldyq gaz qubyrynyń ekinshi jelisiniń qurylysy bastaldy. Bul elimizdiń gaz tasymaldaý júıesin aıtarlyqtaı kúsheıtpek.
Sarapshylardyń pikirinshe, jańa ken oryndarynyń iske qosylýy men óńdeý zaýyttarynyń salynýy elimizdiń gaz salasyn jańa deńgeıge shyǵaryp, ishki suranysty qamtamasyz etýmen qatar, eksporttyq áleýetin de arttyrady.