Rıga tarıhy murajaıynda Qazaqstan Respýblıkasynyń Prezıdenti Nursultan Nazarbaevtyń «G-global: XXI ǵasyr álemi» avtorlyq kitabynyń latysh tilinde shyqqan nusqasynyń tusaýkeseri ótti.
Saltanatqa Latvııanyń kórnekti qoǵam jáne saıası qaıratkerleri, depýtattar, sarapshylar, jýrnalıster, iri kompanııalardyń basshylary, sondaı-aq, dıplomattar qatysty. Tusaýkeser Rıganyń ejelgi jáne kórikti ǵımarattarynyń birinde ótti.
Qazaqstan Respýblıkasynyń elshisi Baýyrjan Muhametjanov jınalǵan qaýym aldynda sóz sóılep, qaýipsiz jáne ádiletti álemdik tártipti ornatý jolynda búkil adamzatty biriktirý degen Prezıdent N.Á.Nazarbaevtyń G-GLOBAL bastamasynyń negizgi máni týraly aıtyp berdi. Ol Qazaqstan basshysynyń bastamasyna bildirgen qyzyǵýshylyǵy úshin latysh tarapyna alǵysyn bildirip, ony Qazaqstan usynyp otyrǵan kommýnıkatıvti alańda jahandyq qurylym jónindegi únqatysýǵa belsene qatysýǵa shaqyrdy.
N.Nazarbaevtyń kitaby men «G-Global» ıdeıasy latvııalyq sarapshylardyń qyzyǵýshylyǵy men oń pikirlerin týdyrdy. Olardyń pikirinshe, Qazaqstan basshysynyń eńbegi strategııalyq oılarmen, kóptegen jahandyq oqıǵalardy, sondaı-aq halyqaralyq saıasat pen ekonomıkadaǵy baısaldy ózgeristerdi taldaýymen ózekti.
Latvııa Jazýshylar odaǵynyń prezıdenti Iýrıs Paıderstiń aıtýynsha, Qazaqstan Prezıdenti Latvııada úlken bedelge ıe. Qazaqstan basshysy kitabynyń latysh tilinde shyǵýy eki el arasyndaǵy qatynastardyń damýyna septigin tıgizip qana qoımaı, bolashaqta elderimiz qaı baǵytta damıtyny týraly túsiniktiń qalyptasýyna oń yqpal etedi.
Seım depýtaty, Qazaqstan Parlamentimen yntymaqtastyq tobynyń basshysy Ingýna Sýdraba kitaptyń latysh tilinde shyǵýy dostas Qazaqstan halqynyń mádenıetin, dástúrin jáne bolashaqtaǵy josparlaryn túsinýge múmkindik beretinin atap kórsetti.
Elbasynyń kitaby Latvııanyń joǵary oqý oryndaryna, kitaphanalarǵa, ǵylymı jáne zertteý ortalyqtaryna taratylady. Kitap Latvııa ýnıversıtetiniń keıbir fakýltetteriniń qosymsha oqýlyqtar tizimine engizildi.
«Egemen-aqparat».