Eýrazııanyń kindik tusynda ornalasqan elimizdiń kólik-logıstıka áleýeti aýqymdy. Sol áleýetti tıimdi paıdalaný, ınfraqurylymdyq jobalardy kórshiles eldermen aradaǵy ıntegrasııa aıasynda iske asyrý turǵysynan birqatar bastama kóterildi. Memleket basshysy Qasym-Jomart Toqaev byltyrǵy Joldaýynda «Kólik-logıstıka sektoryn damytý – strategııalyq máni aıryqsha basymdyq» ekenin aıtty. «Elimiz Eýrazııa qurlyǵynyń dál ortasynda ornalasqan. Bul – bizge álemdik básekede zor múmkindik beretin artyqshylyq. Sondyqtan kólik ınfraqurylymyna salynyp jatqan árbir ınvestısııa ózin-ózi aqtaıtyny sózsiz», dedi Prezıdent.
Memleket basshysynyń aıtýynsha, keıingi urpaqqa joǵary sapaly avto jáne temirjoldardy qaldyrý kerek. Sondaı-aq tıimdi jumys isteıtin áýe habtaryn, temirjol beketteri men teńiz porttaryn salý da – mańyzdy mindet. Prezıdenttiń osynaý irgeli tapsyrmasyn oryndaý maqsatynda kóptegen joba qarqyndy júrgizilip jatyr. Qazirgi ýaqytta temirjol salasynda jalpy uzyndyǵy 1 300 shaqyrymnan asatyn 4 iri joba qolǵa alynǵan. Olardyń qatarynda Dostyq – Moıynty, Almaty qalasynyń aınalma temirjoly, Darbaza – Maqtaaral jáne Baqty – Aıagóz bar. Bıyl Almaty qalasynyń aınalma temirjoly men Dostyq – Moıynty ýchaskesiniń ekinshi jolynyń qurylysy aıaqtalady. Bul júk tasymaly kólemin 5 ese arttyrýǵa múmkindik bermek.
Al Transqazaqstandyq temirjol dálizi jobasy sheńberinde 5 jylda 16 myń shaqyrym temirjol salynyp, jóndelýge tıis. 125 temirjol vokzaly aýqymdy jańǵyrtýdan ótip jatyr. Bul – absolıýtti rekordtyq kórsetkish. Jolaýshylar vagondary parkin jańartý da jalǵasyn tapty: bıyl park 175 jańa vagonmen tolyǵady, onyń ishinde 51 birligi – «Shtadler» kompanııasynyń ónimi.
Damý baǵytynyń aıqyndalýy sońǵy geosaıası daǵdaryspen tuspa-tus kelgen Transkaspıı halyqaralyq kólik dáliziniń bolashaǵyn da asa joǵary dep baǵalaıdy mamandar. Mýltmodaldy baǵyt retinde sıpattalatyn bul kólik marshrýtynyń áleýetin arttyrý maqsatynda qazir Aqtaý jáne Quryq porttarynyń júkteme áleýeti arttyrylyp jatyr. Jańǵyrtýdan keıin atalǵan eki porttyń júk qabyldaý, júk jetkizý múmkindikteri eselep kóbeımek. Bul – taraptar úshin qolaıly múmkindik. Jýyrda Qytaı tarapymen birlesip Aqtaý portynda konteınerlik termınal iske qosyldy. Sıan qalasynda bizdiń qurǵaq port tabysty jumys istep jatyr. Selıatıno, Svısloch jáne Býdapesht mańynda da jańa termınaldar boı kótermek. Maýsym aıynda Grýzııanyń Potı portynda elimizdiń alǵashqy mýltımodaldy termınaly ashyldy.
Almaty, Qyzylorda, Shymkent qalalarynda jańa jolaýshylar termınaldary ashylyp, Prezıdent nazar aýdarǵannan keıin Arqalyq áýejaıynyń jumysy qalpyna keltirilýde. Katonqaraǵaı, Zaısan, Kendirli turǵyndarynyń da jańa áýejaı qyzmetin paıdalanatyn kúni alys emes.
Júk tasymalyn arttyrý jáne avıasııalyq habtardy damytý úshin 6 áýejaı anyqtaldy. Olardy damytýǵa jeke ınvestısııa tartý josparlanǵan. Bıyl 36 jańa halyqaralyq áýe baǵyty ashylyp, 8 sheteldik áýe kompanııasy qazaqstandyq naryqqa kirdi. Ishki baǵyttarda 61 marshrýt boıynsha aptasyna 850 reıs oryndalady.
Prezıdent Joldaýda avtokólik joldarynyń da jaı-kúıine toqtalyp: «Bıyl elimizde 12 myń shaqyrymǵa jýyq jol salynyp, jóndelip jatyr. Qazaqstanda mundaı aýqymdy jumys buryn-sońdy bolmaǵan. Astana – Almaty, Aqtóbe – Atyraý – Astrahan, Taldyqorǵan – О́skemen baǵytyndaǵy kúre joldardy qaıta jańǵyrtý jumystary aıaqtalyp qaldy. 2,5 myń shaqyrymǵa sozylatyn oblysaralyq jáne aýdanaralyq joldardy orta deńgeıde jóndeýge arnalǵan baǵdarlamanyń mán-mańyzy zor. Dál osy joldarmen jurt óte jıi júredi. Sondyqtan baǵdarlamanyń aýqymyn keńeıtip, oǵan keminde 10 myń shaqyrym joldy qamtýdy tapsyramyn», dep naqty mindet júktedi.
Bıyl jol qurylysy men jóndeý jumysymen 13 myń shaqyrym jol qamtylypty. Ortalyq – Batys dálizi qurylysy bastalyp, Aqtóbe – Ulǵaısyn, Qaraǵandy – Jezqazǵan ýchaskelerinde jáne Saryaǵash, Rýdnyı, Shymkent qalalarynyń aınalma joldarynda qurylys qyza tústi. Qalbataý – Maıqapshaǵaı joly da aıaqtalýǵa jaqyn. Júk kólikteriniń shamadan tys júktemesin baqylaý úshin 2025 jylǵa deıin 220 avtomattandyrylǵan ólsheý stansasyn ornatý josparlanǵan.