Astana qalasynyń ákimi Jeńis Qasymbek Instagram paraqshasynda elordany sýmen qamtý máselesi qalaı sheshiletini týraly jazdy, dep habarlaıdy Egemen.kz qala ákimdiginiń resmı saıtyna slteme jasap.
Ákimniń aıtýynsha, qazirgi tańda elordada jylý qýatyn arttyrý boıynsha naqty sharalar qabyldanǵan. Bul, ásirese, gaz jylý stansııalaryn (GJS) salý esebinen júzege asýda.
«Biz qazirdiń ózinde gaz jylý stansııalarynyń qurylysy arqyly qalanyń jylý qýatyn ulǵaıttyq. Bul jańa nysandardy paıdalanýǵa berýge múmkindik beredi», dedi Jeńis Qasymbek.
Sondaı-aq jańa qosalqy elektr stansııalary salynyp, qoldanystaǵy nysandar jańǵyrtylyp jatyr.
2023 jyldyń kókteminde Astanada sý tapshylyǵy máselesi oryn alǵan edi. Bul jaǵdaıdyń qaıtalanbaýy úshin keshendi sharalar qabyldanyp, sol jyly jazda jańa sý qubyry men úshinshi sorǵy-súzgi stansııasy (SSS-3) iske qosylǵan.
«Qazirgi ýaqytta qalada qýat tapshylyǵy joq. Budan bólek, aldaǵy jyldarǵa arnalǵan qor da bar», dep atap ótti qala ákimi.
Astanany qosymsha turaqty sýmen qamtý maqsatynda «Telman» sorǵy stansııasynda tehnıkalyq sý qubyry salynyp jatyr. Bul joba sorǵy stansııasynyń jobalyq qýatyn táýligine 160 myń m³ kóleminde tolyq iske qosýǵa múmkindik beredi. Sonymen qatar Nura jerasty sý ornynda sý qubyry salý jobasy ázirlenip jatyr.
Uzaqmerzimdi sharalardyń biri retinde, Q.Sátbaev atyndaǵy arnadan jańa sý qubyry men tórtinshi sorǵy-súzgi stansııasynyń (SSS-4) qurylysy bastaldy. Bul jobanyń negizgi kórsetkishteri:
Sý alý nysanynyń ónimdiligi – táýligine 342 myń m³,
SSS-4 qýaty – táýligine 210 myń m³.
Atalǵan jobanyń iske asyrylýy 2035 jylǵa deıin qala halqyn taza aýyz sýmen turaqty qamtamasyz etýge múmkindik beredi.
Sonymen qatar, Hýseın ben Talal kóshesinen Syǵanaq kóshesine deıingi sý qubyryn tuıyqtaý jobasy ázirlenip jatyr. Bul Turan dańǵylynyń batys bóligindegi turǵyn aýdandardy sýmen qamtý máselesin sheshedi. Jobalaý jumystary 2025 jyldyń jeltoqsanynda aıaqtalady.