Astanada alǵash ret bochchadan «Astana 2025 World Boccia Challenger» bedeldi halyqaralyq jarysy ótip jatyr. Saıys Halyqaralyq bochcha federasııasynyń (BISFed) qoldaýymen uıymdastyrylyp otyr. Týrnır barysynda álemniń 12 elinen kelgen sportshylar baq synaıdy. Jarystaǵy kórsetkishterine baılanysty olarǵa 2028 jyly Los-Andjeleste ótetin Paralımpıada oıyndaryna qatysý úshin reıtıngtik upaılar beriledi. Jaqsylyq Úshkempirov atyndaǵy Jekpe-jek saraıynda jalaýy jelbiregen irgeli saıystyń saltanatty ashylý rásimine Qazaqstan Bochcha federasııasynyń prezıdenti Máýlen Áshimbaev qatysty.
Máýlen Áshimbaev óz sózinde jarysqa qatysýshylarǵa iltıpat bildirip, Qazaqstan Prezıdenti Qasym-Jomart Toqaev elimizde ınklıýzıvti qoǵam qalyptastyrýǵa úlken kóńil bólip otyrǵanyna jáne bul baǵyttyń negizgi basymdyqtaryna nazar aýdardy. Sondaı-aq Federasııa prezıdenti elimizde alǵash ret ótkizilip otyrǵan iri halyqaralyq jarystyń mańyzyna toqtalyp, týrnırge Koreıa, Sıngapýr, Úndistan, Italııa, Iran, О́zbekstan, Saýd Arabııasy, Mońǵolııa, Kıpr, Birikken Arab Ámirlikteri jáne basqa da elderden kelgen 56 úzdik sportshy qatysyp jatqanyn aıtty. Mundaı aýqymdy is-shara elimizde paralımpıadalyq sportty damytý jáne barshaǵa teń múmkindik jasaý jolynda atqarylyp jatqan jumystardyń naqty nátıjesi ekeni anyq.
«Elimizdiń ınklıýzııa, teńdik, qurmet pen erik-jiger dáripteletin jahandyq qoǵamdastyqtyń beldi ókiline aınalǵanyn maqtan tutamyz. Prezıdent Qasym-Jomart Toqaev elimizde parasportty damytýǵa jáne bul salanyń qoǵam úshin mańyzy zor ekenine únemi basa mán berip keledi. Búginde elimizde parasportshylarǵa óz áleýetin iske asyryp, maqsattaryna jetýleri úshin barlyq jaǵdaı jasalyp otyr. Bul rette «World Boccia Challenger» týrnıri de elimizde parasportty jáne ınklıýzııa mádenıetin ilgeriletýge yqpal etedi dep senemiz», dep M.Áshimbaev bedeldi saıysty Qazaqstanda ótkizýdi uıǵarǵany úshin Halyqaralyq bochcha federasııasyna jáne osy iske atsalysqan komandaǵa alǵys bildirdi.
Sondaı-aq ashylý rásiminde qysqa merzim ishinde Qazaqstan bochcha federasııasy, jattyqtyrýshylar, parasportshylar, ata-analar jáne nıettes jandar men eriktiler orasan zor jumys atqarǵany aıtyldy. Qazirgi tańda elimiz boıynsha 250-den asa múmkindigi shekteýli jan osy sportpen turaqty shuǵyldanyp keledi. Olardyń qatarynda balalarmen birge eresekter de bar.
«Federasııanyń, ata-analar men jattyqtyrýshylardyń erik-jigeriniń arqasynda Qazaqstanda bochcha qarqyndy damyp keledi. Qazirdiń ózinde elimizdiń 20 qalasynda jattyǵýlar júıeli túrde ótkiziledi. Ulttyq federasııadan bólek, 10 óńirlik federasııa quryldy. Turaqty uıymdastyrylatyn ulttyq týrnırler parasportshylarǵa jańa múmkindikter berip, olardy jigerlendire túsedi. Qazirgi tańda bizdiń el álemdik reıtıngte 18-orynda jáne Ortalyq Azııada kósh bastap turǵanyn da atap ótken jón. Kózdegen maqsatqa jetý jolyndaǵy tabandylyq pen adaldyqtaryńyz úshin barshańyzǵa alǵysymdy bildiremin. Sizder óz is-áreketterińizben shyn júrekten senip, tek alǵa umtylǵan jan kez kelgen bıikti baǵyndyra alatynyn dáleldep kelesizder», dedi M.Áshimbaev.
Uıymdastyrýshylar atap ótkendeı, mundaı týrnırler – mańyzdy sporttyq saıys qana emes, sonymen qatar tájirıbe almasý, halyqaralyq yntymaqtastyqty damytý jáne óńirde ınklıýzıvti sport túrlerin dáripteý alańy. Búginde ulttyq qurama iri halyqaralyq jarystarǵa belsendi qatysyp keledi. Sondaı-aq qatarynda 50-den asa el bar BISFed-tiń álemdik reıtınginde AQSh, Ispanııa jáne basqa da jetekshi quramalardan joǵary tur. Al Ortalyq Azııada Qazaqstan – bochchadan absolıýtti kóshbasshy. Odan bólek, keıingi jyldarda Ulybrıtanııa, Úndistan, Taıland jáne Ońtústik Koreıa mamandarynyń qatysýymen halyqaralyq jattyqtyrýshylar men tóreshilerge arnalǵan kýrstar, jattyqtyrýshylardyń biliktiligin arttyrý boıynsha keshendi jumystar júıeli júrgizilip keledi. Osyndaı naqty qadamdardyń arqasynda úsh jyl ishinde bochchadan respýblıkanyń 12 sport sheberi shyqty.
Aıta keteıik, «Astana 2025 World Boccia Challenger» saıysyn Týrızm jáne sport mınıstrliginiń, «Samuryq-Qazyna» AQ-nyń, «Sport Qory» Týrızm jáne sport ındýstrııasyn qoldaý qorynyń jáne basqa da seriktesterdiń qoldaýymen Qazaqstan bochcha federasııasy uıymdastyrdy.