Aqtaýda avtogaz quıý stansııalarynda uzyn-sonar kezekter paıda boldy. Jaǵdaıǵa baılanysty qala ákimdigi túsinikteme berdi, dep habarlaıdy Egemen.kz.
Ákimdiktiń málimetinshe, qazirgi tańda qalada 32 avtogaz quıý stansııasy jumys istep tur. Kezekter negizinen tańerteńgi jáne keshki ýaqyttarda baıqalady.
«Qaladaǵy suıytylǵan gazǵa suranystyń artýy ishki týrızmniń ósýimen, sondaı-aq ózge oblystardan keletin avtokólik sanynyń kóbeıýimen baılanysty. Budan bólek, demalys kúnderi aýdan turǵyndarynyń mektepke qajetti qural-jabdyqtardy alý úshin qalaǵa aǵylýy da kólikter sanyn arttyrady», – dep túsindirdi ákimdiktegiler.
Sonymen qatar, gaz tapshylyǵy joq ekeni atap ótildi. Qala ákimdigi jaǵdaı baqylaýda ekenin habarlady.
«Kúnine eki ret avtogaz quıý stansııalarynyń jumysyna monıtorıng júrgiziledi. Qala mańynda jáne trassalarda kezek baıqalmaıdy», – dedi ákimdikte.
Málimetke sáıkes, Aqtaýǵa kún saıyn «QazGPZ» JShS tarapynan orta eseppen 170–180 tonna suıytylǵan gaz jetkiziledi. Al 22–23 tamyz kúnderi «ANPZ» JShS 160 tonna kóleminde otyn jóneltti. Shildemen salystyrǵanda jetkizilim kólemi ósken: ótken aıda «ANPZ» 217,6 tonna gaz jiberse, tamyzda bul kórsetkish 320 tonnaǵa jetti.
Ákimdiktiń aıtýynsha, jazǵy maýsymda týrısterden bólek, qala turǵyndarynyń da belsendiligi artyp, olardyń jıi saparǵa shyǵýy jalpy otyn tutyný kólemine áser etedi.