Kókshetaýda ótken túngi júgirý jarysy qaıǵyly jaǵdaımen aıaqtaldy. 35 jastaǵy qatysýshy 5 shaqyrymdyq qashyqtyqta ózin nashar sezinip, esinen tanyp qalǵan, dep habarlaıdy Egemen.kz.
Jarys ornynda kezekshi bolǵan medısınalyq brıgada dereý alǵashqy kómek kórsetip, jedel túrde áıeldi aýrýhanaǵa jetkizdi. Degenmen, dárigerlerdiń barlyq áreketine qaramastan, sportshy kelesi kúni tańerteń esin jımastan qaıtys boldy.
Aqmola oblysy sport basqarmasynyń málimetinshe, marqum buryn-sońdy densaýlyǵyna shaǵymdanbaǵan, jaqsy sporttyq qalypta bolǵan. Qazir onyń ólimine qatysty medısınalyq saraptama taǵaıyndaldy, naqty sebepteri keıin belgili bolady.
Bul elimizde sporttyq jarys kezinde bolǵan alǵashqy qaıǵyly jaǵdaı emes. Buǵan deıin de marafondar men jarystarda qatysýshylardyń densaýlyǵy syr berip, kútpegen oqıǵalar tirkelgen. Sarapshylardyń pikirinshe, mundaı jarystarǵa qatysar aldynda mindetti túrde medısınalyq tekserýden ótý qajet.