Maqsat – ǵylymı ınnovasııany engizý

Búginde elimizde bilim berý salasyn túbegeıli jańǵyrtý úderisi júrýde. Onyń jańa órisi men arnasy joǵary tehnologııalyq júıeler – mýltımedııalyq utqyrlyq, nano jáne ǵaryshtyq turǵydaǵy ilim-bilimdi tereńdete túsýden tamyr tartady. Robotty tehnıkalardy engizý men bolashaq energııasyn óndirý jónindegi XXI ǵasyr talaptary da osy qatarda tur. Árıne, bul úshin, eń aldymen, bilikti de bilimdi mamandar ázirleý qajettigi týyndaıdy. Osy oraıda elimizdiń joǵa­ry tehnıkalyq mektepterine júktelgen jaýapkershilik jo­ǵary. Iаǵnı, onyń túlekteri joǵaryda atalǵan keń aýqym­dy baǵdarlamalardyń baıy­byna bara almasa, báseke­ge qabilettilik týraly sóz qoz­ǵaýdyń ózi artyq. Bul máseleni Eýrazııalyq ekonomıkalyq keńistik sheńberinde de utymdy sheshýge bolatyndyǵyn Kaz­IITÝ ǵylym-bilim kesheni uıyt­qy bolyp júrgen ıntegra­sııalyq bastamalardan baıqaı alamyz. Atalǵan keshen bazasynda Eýrazııalyq ekonomıkalyq keńistik sheńberindegi máse­leler bıylǵy jyly shoqtyǵy bıik naqty is-sharalar turǵy­synan kórinis taba bastady. Mysaly, munda bıylǵy jy­ly «Ǵylym. Bilim. Tájirıbe» taqy­rybynda Qazaqstan men Reseıdiń irgeli jáne qoldan­baly ǵylymynyń beldi ókil­deri bas qosyp, kórshi memle­ketterdegi bilim berý salasyn jańǵyrtý máselelerin ǵylymı turǵydan saralap berdi. Ásirese, ǵylym men bilimge ınnovasııany engizýdiń ózekti jaıttary jóninde tyń, sony oı-pikirler aıtyldy. Qalaı degende de, ınte­gra­sııalyq baılanystardy baıytý maqsatyn kózdeıtin bas­qosýlardyń máni zor demekpiz. Ásirese, álemde bolyp jatqan áleýmettik-ekonomıkalyq tu­raqsyzdyq jaǵdaıynda onyń róli men tıgizer yqpaly joǵary bolmaq. Mundaı synı kezeńde elder arasyndaǵy qarym-qatynasty nyǵaıtý, sonymen birge, shekara men ulttyq qaýipsizdikke qajetti faktorlardy jasaqtaı bilýdiń de orny bólek. – Qazaqstan, Reseı jáne Belarýs memleketteri joǵa­ry oqý oryndary men ǵylymı mekemeler arasyn­daǵy ıntegrasııalyq úrdis­terdi oń jolǵa qoıý osyndaı ıgi maqsattan bastaý ala­dy. Reseılik ǵalymdar akade­mııalyq oralymdylyq sheń­berinde bizdiń keshenniń magıstranttary men stýdentteri úshin dárister oqydy, – dedi osy maqalany gazetke ázirleý barysynda KazIITÝ ǵylym-bilim kesheniniń prezıdenti, tehnıka ǵylymdarynyń kandıdaty Aqserik Áıtimov. Túıip aıtqanda, Oral qalasynda dástúrge aınalǵan ıntegrasııalyq basqosýlar qoldaýǵa da, quptaýǵa da ábden turarlyqtaı oń bastama dep sanaımyz. Bul úrdis óńirdegi ǵylym men bilim salasyn odan ári órkendetýge óz úlesin qosatynyna senim mol. Temir QUSAIYN, «Egemen Qazaqstan». ORAL. Sýrette: ıntegrasııalyq basqosýdan kórinis.