Ol jańalyqtyń jarshysy, óner men mádenıettiń qamqor tulǵasy edi. Teatr men dramatýrgııanyń ózekti máselelerin bir adamdaı túsinip, tushynyp jazatyn.
Talaı márte ótkizgen is-sharamyzdyń basynan aıaǵyna deıin qatysyp, «Egemen Qazaqstan» gazetine jarııalaǵansha tynym tappaıtyn. О́te jaýapkershiligi mol Aıgúldi dál osylaı kete barady dep kim oılaǵan?.. Ras, sońǵy kezderi «naýqastanyńqyrap júrmin, Kókshetaýǵa demalys ornyna baryp emdelip kelemin» degenin estigenbiz. Byltyr ǵana Prezıdent qolynan marapat alý úshin Aqordaǵa barǵanda dári-dármek kúshimen qalaı tez jazylyp, «aıaqqa turǵanyn» ózine tán ádemi kúlkisimen shynaıy aıtyp bergen edi.
Qalamy ushqyr, máseleni tereńinen tolǵap kótere alatyn qarymdy jýrnalıst Aıgúldiń jospary kóp-tin. Áli de bolsa ult rýhanııatyna bereri mol edi. Onyń qazasy – bárimiz úshin orny tolmas ókinish. Otbasyna, týǵan-týystaryna, shyǵarmashyl áriptesterine, qalyń jurtshylyqqa qaıǵyra kóńil aıtamyz. Allanyń panasynda bolsyn.
Amangeldi MUQAN,
ónertaný ǵylymdarynyń kandıdaty, teatrtanýshy