1 tamyzdaǵy jaǵdaı boıynsha el aýmaǵynda jergilikti atqarýshy organdardyń ruqsatymen 14 130 shetel azamaty eńbek etedi, dep habarlaıdy Egemen.kz.
Esterińizge sala keteıik, sheteldik jumys kúshin tartý birneshe sanatqa bólinedi. Sonyń ishinde birinshi sanat boıynsha – basshylar men olardyń orynbasarlaryna 549 ruqsat, al ekinshi sanat – qurylymdyq bólimsheler basshylaryna 2 258 ruqsat berilgen. Negizgi bóligi mamandar men bilikti jumysshylarǵa tıesili: úshinshi sanatta – 3 786 adam, tórtinshi sanatta – 904 adam. Budan ózge, maýsymdyq jumystarǵa 2 889 sheteldik tartylsa, korporatıvtik aýysym aıasynda 3 744 adam eńbek etip jatyr.
Eńbek jáne halyqty áleýmettik qorǵaý mınıstrliginiń habarlaýynsha, qazirgi kezde Qazaqstanda 1 899 jumys berýshi shetel mamandaryn paıdalanyp otyr. Bul uıymdarda 348 myńnan astam qazaqstandyq eńbek etedi, ıaǵnı jalpy qyzmetkerler quramynyń 96%-yn quraıdy.
«Ekonomıkalyq qyzmet túrleri boıynsha eń kóp jumys isteıtinder: qurylys salasynda – 4 949 adam, aýyl, orman jáne balyq sharýashylyǵy – 2 930 adam, taý-ken ónerkásibi jáne karerlerdi qazý – 1 369 adam, óńdeý ónerkásibi – 1 210 adam», delingen habarlamada.
Sheteldik jumys kúshiniń basym bóligi myna elderden kelgen: Qytaı – 5 120 adam, О́zbekstan – 2 478 adam, Túrkııa – 1 042 adam, Úndistan – 1 031 adam.