Elimiz aldaǵy onjyldyqta «Taza energııaǵa» kóshýdi kózdep otyr. Iаǵnı kómir men munaıǵa táýeldilikti azaıtyp, kún, jel, sý energııasyn kóbirek paıdalanady. Biraq basty másele bar: osy jobalardy júzege asyratyn mamandar jetkilikti me? Bul týraly Egemen.kz tilshisi zerdelep kórdi.
Búkil dúnıejúzinde «jasyl» jumys oryndary kóbeıip keledi. Halyqaralyq agenttiktiń dereginshe, 2023 jyly jańartylatyn energııa salasynda 16 mıllıonnan astam adam eńbek etken. Onyń jartysyna jýyǵy Qytaıda. Ásirese kún elektr stansııalary jetekshi orynda tur, olarda 7 mıllıonnan astam jumys orny bar.
Bolashaqta eń kóp suranysqa ıe mamandyqtardyń ishinde: jańartylatyn energııa ınjeneri, ekologııalyq ınjener, elektr kóligi boıynsha mamandar bolǵaly tur.
Elimizde ázirge bul salada 2 myńnan astam qyzmetker ǵana jumys isteıdi. Olardyń kóbi jel, kún jáne sý elektr stansııalarynda eńbek etedi. Áıelderdiń úlesi nebári 14 paıyz.
Degenmen jospar aýqymdy. 2030 jylǵa deıin 90-nan asa jańa joba iske qosylady. Oǵan halyqaralyq iri kompanııalar da qatysady. 12 myń jańa jumys orny ashylady.
Qazaq Green qaýymdastyǵynyń tóraǵasy Nurlan Kápenovtiń aıtýynsha, jańartylatyn energııaǵa kóshý birtindep júredi. «Kádimgi stansııalar óz ómirin aıaqtaǵansha jumys isteıdi. Sondyqtan mamandardy da kezeń-kezeńimen daıyndaýymyz qajet», deıdi ol The Astana Times basylymyna bergen suhbatynda.
Elimizdiń ýnıversıtetteri jasyl energetıka boıynsha jańa baǵdarlamalar ashyp jatyr. Máselen, Nazarbaev ýnıversıteti, Almaty energetıka jáne baılanys ýnıversıteti, Sátbaev ýnıversıteti sııaqty oqý oryndarynda kún, jel, sýtegi energııasyna qatysty kýrstar bar.
Jaqyn jyldary «sýtegi energetıkasy ınjeneri» degen jańa mamandyq paıda bolmaq. Mundaı mamandar Astanadaǵy EUÝ, Semeıdegi Shákárim ýnıversıteti, Aqtaýdaǵy Esenov ýnıversıtetinde daıarlanady.
Sarapshylardyń boljamyna sáıkes, jańartylatyn energııaǵa kóshý barysynda munaı-gaz salasynda isteıtin myńdaǵan adam jumysynan aıyrylýy múmkin. Sol sebepti Úkimet olardy qaıta oqytyp, jańa jumysqa ornalastyrýǵa ýáde berip otyr.