Premer-mınıstr Oljas Bektenovtiń tóraǵalyǵymen ótken Úkimet otyrysynda 2026–2028 jyldarǵa jáne 2035 jylǵa deıingi áleýmettik-ekonomıkalyq damý boljamdary, aldaǵy úsh jyldyq kezeńge arnalǵan respýblıkalyq bıýdjet jobasy, sondaı-aq 2026–2028 jyldarǵa arnalǵan jalpy sıpattaǵy transfertter kólemi qaraldy, dep habarlaıdy Egemen.kz.
Qarjy mınıstri Mádı Takıev «2026–2028 jyldarǵa arnalǵan respýblıkalyq bıýdjet týraly» zań jobasyn usynyp, eldiń bas qarjy qujatynyń negizgi parametrleri týraly baıandady.
Onyń aıtýynsha, 2026 jyly bıýdjet kiristeri 23,1 trln teńgeni qurap, 2028 jylǵa qaraı 27,6 trln teńgege deıin artady. Shyǵystar 27,7 trln teńge kóleminde josparlanǵan. Bıýdjet tapshylyǵy 2026 jylǵy JIО́-niń 2,5%-ynan 2028 jylǵa qaraı 0,9%-ǵa deıin tómendeıdi. Mınıstrdiń atap ótýinshe, bıýdjet uzaq ýaqyttan beri alǵash ret Ulttyq qordan nysanaly transfertterdi paıdalanbaı teńgerildi.
Sonymen birge ol bıýdjet áleýmettik baǵdarlanǵanyn, biraq ekonomıkanyń naqty sektoryn memlekettik qoldaý kólemi aıtarlyqtaı ulǵaıǵanyn jetkizdi.
«Shyǵyndardy ońtaılandyrý jáne basymdyq berý boıynsha jumys júrgizildi. Ońtaılandyrylǵan qarajat naqty sektorǵa baǵyttaldy. Ekonomıkanyń ósýin yntalandyratyn shyǵystar 10,9% - dan 16,1%-ǵa deıin ulǵaıyp, 4,470 trln teńgeni qurady», dedi Mádı Takıev.
Shyǵystar qurylymynda negizgi úles dástúrli túrde áleýmettik salaǵa tıesili – jalpy shyǵyndardyń 38,7%-y nemese 10,7 trln teńge. Ekonomıkanyń naqty sektoryn damytýǵa 3,6 trln teńge qarastyrylǵan. Onyń ishinde agroónerkásiptik keshendi qoldaýǵa – 732 mlrd teńge, kólik ınfraqurylymyn damytýǵa – 855 mlrd teńge bólinedi. Budan bólek respýblıkalyq joldardy salýǵa memlekettik kepildikter tetigi arqyly 580 mlrd teńge tartý kózdelgen. Kúshtik blok shyǵystary 3 trln teńgeden asady.
Premer-mınıstr Oljas Bektenov zań jobalaryna qatysty pikir bildirip, Memleket basshysynyń tapsyrmalaryn eske saldy:
«Prezıdent bıýdjettiń teńgerimdiligin saqtaýdy, respýblıkalyq jáne jergilikti deńgeılerde qarajatty sapaly josparlap, tıimdi bólýdi tapsyrdy. Zań jobalary (jalpy sıpattaǵy transfertterdiń kólemi jáne 2026-2028 jyldarǵa arnalǵan respýblıkalyq bıýdjet týraly) bıýdjettik parametrlerge sáıkes ázirlendi, sondaı-aq memlekettik qarjynyń turaqtylyǵyn qamtamasyz etý úshin barynsha ońtaıly. Jalpy alǵanda bıýdjet teńdestirilgen jáne Memleket basshysynyń barlyq strategııalyq bastamalary eskerilgen. Jalpy sıpattaǵy transfertter kólemi О́ńirlik standarttar júıesine sáıkes, óńirlerge bazalyq ınfraqurylymnyń qoljetimdi bolýyna teńdeı jaǵdaıdy qamtamasyz etip otyr. Prezıdent tapsyrmasyna sáıkes, bıýdjet áleýmettik máselelerge baǵdarlanǵan», dedi Úkimet basshysy.
Sonymen qatar respýblıkalyq bıýdjet jobasyn jáne jalpy sıpattaǵy transfertterdi ázirleý barysynda jańa Bıýdjet jáne Salyq kodeksteriniń erejeleri eskerilgeni atap ótildi.