Energetıka mınıstrligi aldaǵy jylytý maýsymyna daıyndyq barysyn jarııalady. Mınıstr Erlan Aqkenjenovtiń aıtýynsha, bıyl eldegi elektr stansııalarynda aýqymdy jóndeý jumystary júrgizilýde jáne barlyǵy belgilengen ýaqytynda aıaqtalady, dep jazady Egemen.kz.
Jospar boıynsha 10 energııa blogy, 63 qazandyq pen 39 týrbına jóndelýi tıis. Qazirdiń ózinde 5 energııa blogy, 22 qazandyq pen 12 týrbınanyń jumysy tolyqtaı aıaqtaldy, qalǵandary ártúrli kezeńderde jańartylyp jatyr.
Jalpy jóndeýge 376,7 mıllıard teńge qarastyrylǵan, bul ótken jylmen salystyrǵanda 13 paıyzǵa artyq. Elektr berý jelilerinde de aýqymdy jumystar júrgizilýde: 17 myń shaqyrymǵa jýyq jeli, 420 qosalqy stansa, 3,5 myń taratý pýnkti men transformator jóndelip jatyr. Búginde olardyń basym bóligi jańartylyp úlgerdi. Al jylý júıesinde 323 shaqyrym qubyrdy qaıta salý josparlansa, sonyń 215 shaqyrymy, ıaǵnı ekiden úsh bóligi oryndaldy.
Mınıstrdiń aıtýynsha, barlyq jóndeý jumystary merziminde bitedi. Demek, bıyl qysta halyq jaryq pen jylýdan qıyndyq kórmeı, alańsyz otyra alady.