Qazaqstanda 2025 jyly 323 shaqyrym jylý jelisin kúrdeli jóndeý jáne qaıta qurýǵa 129,4 mlrd teńge baǵyttalady. Bul týraly Úkimet otyrysynda Energetıka mınıstri Erlan Aqkenjenov málimdedi, dep jazady Egemen.kz.
Onyń aıtýynsha, qarjynyń negizgi bóligi – 104,2 mlrd teńge respýblıkalyq bıýdjetten, al 25,2 mlrd teńge kásiporyndardyń tarıftik smetasy esebinen bólinedi.
««Búgingi tańda oryndaý 66% quraıdy. Ákimdikterge bastalǵan jumystardy jylytý kezeńi bastalǵanǵa deıin aıaqtaýdy tapsyrýdy suraımyz», dedi mınıstr.
Budan bólek, mınıstr bıyl jedel sharalar qabyldaý úshin Úkimet rezervinen qosymsha 47,6 mlrd teńge bólingenin atap ótti. Bul qarjy jylý kózderi men jelilerin salýǵa, rekonstrýksııalaýǵa jáne kúrdeli jóndeýge jumsalyp jatyr. Atap aıtqanda:
Jylý kózderin salýǵa – 20 mlrd teńge; Jylý kózderin jóndeýge jáne qaıta qurýǵa – 8,7 mlrd teńge; Jylý jelilerin jóndeýge – 5,5 mlrd teńge; Jylý jelileri boıynsha bıýdjettik ınvestısııalyq jobalarǵa – 13,4 mlrd teńge baǵyttaldy.