Almatyda Jastar saıasaty basqarmasynyń qoldaýymen «Jas Camp» jastar lageri jumysyn bastady. Bıyl lagerge 100 qatysýshy iriktelip alynǵan. Olardyń qatarynda stýdentter, komıýnıtı ortalyqtarynyń rezıdentteri, eriktiler, jastardyń ekologııalyq qozǵalystarynyń ókilderi jáne NEET sanatyndaǵy jastar bar, dep jazady Egemen.kz.
Bes kún ishinde qatysýshylar kóshbasshylyq daǵdylaryn damytyp, áleýmettik jobalar jasaýdy úırenbek.
Lager baǵdarlamasynda trenıngterge, sheberlik synyptaryna, fasılıtasııalyq sessııalarǵa, vorkshoptarǵa jáne túrli mádenı is-sharalarǵa qatysýǵa bolady. Tálimgerler men sarapshylar arasynda tanymal jattyqtyrýshylar Ashat Ábjanov, Kamılla Ákimbekova, Janel Sarıeva, Dana Shaıahmet sekildi mamandar bar.
«Jas Camp-bul jaı ǵana bilim berý alańy emes, jastardy ózderiniń sheshimderi men áreketteri úshin jaýapkershilikke úıretetin keńistik. Jobaǵa qatysýshylar kún saıyn komandalyq túrli jattyǵýlarǵa qatysady,qoǵamdaǵy jeke róldiń mánin túsinedi, qaladaǵy qundylyqtardyń mańyzy jáne bolashaq týraly pikir talastyrady. Munda ekologııalyq mádenıet pen jastardyń damýyna erekshe kóńil bólinýde», - deıdi Almaty qalasy Jastar saıasaty basqarmasynyń basshysy Ázız Kájdenbek.
Uıymdastyrýshylar atap ótkendeı, ár qatysýshynyń rýhanı ósýi, kóshbasshylyq qasıetterdi ıgerýi olardyń aldaǵy bolashaǵyna tyń serpin beredi. Jastar jaýapkershilikti óz moınyna alýǵa, bolashaq týraly oılanýǵa, ekologııalyq taza ári qaýipsiz qoǵam qurýǵa umtylady.