Búgingi qoǵamnyń damýy – erteńgi urpaqtyń sapaly bilim alýyna tikeleı baılanysty. HHI ǵasyrda bilim salasy qarqyndy ózgeristi bastan keshirip otyr. Jańa tehnologııalar, sıfrlandyrý, jasandy ıntellekt – barlyǵy da mekteptegi oqýshynyń bolashaǵyna yqpal etedi.
Sondyqtan «Keleshek mektepteri» ulttyq jobasy bilim beretin oryn ǵana emes, ol ár balaǵa ózin-ózi tabýǵa múmkindik beretin jańa keńistik. Memleket basshysy Qasym-Jomart Toqaev: «Ádiletti Qazaqstandy qurý úshin biz eń aldymen sapaly bilim berý júıesin qalyptastyrýymyz kerek» dep aıtqan edi. Bul «Keleshek mektepteri» baǵytyn aıqyndaıtyn baǵdarsham ispetti.
Atalǵan ulttyq jobanyń maqsaty – elimizdiń barlyq aımaǵynda kez kelgen balaǵa qoljetimdi jańa formattaǵy bilim berý uıymdaryn qurý. Dálirek aıtqanda, ulttyq joba balalardyń turǵylyqty jerine qaramastan, zaman talabyna saı jaǵdaıda sapaly bilim alý múmkindigin qamtamasyz etýge baǵyttalǵan. Jobanyń basty artyqshylyǵy – onda oqýshylarǵa qolaıly, ergonomıkalyq bilim berý keńistigi jasalyp otyr. Bul mektepterdiń kólemi tıptik jobalarǵa qaraǵanda 15-20%-ǵa úlken, al tehnıkalyq jaraqtanýy 4 esege artyq. Osynyń bári ustazdardyń jumysyn jeńildetip, oqýshylardyń bilim sapasyn kóteredi.
Prezıdent bastamasymen qolǵa alynǵan «Keleshek mektepteri» ulttyq jobasy aıasynda Jezqazǵan qalasyndaǵy Qabanbaı batyr eldi mekeninde ekiqabatty 300 oryndyq bilim ordasy boı kóterdi. Qazirgi tańda bilim berý nysany oqýshylarǵa qolaıly zamanaýı úlgidegi qural-jabdyqtarmen jabdyqtaldy. Jetkinshekterdiń jan-jaqty shyǵarmashylyq damýyna tolyq jaǵdaı jasalǵan. Jańa zamanaýı bilim oshaǵynda qaýipsizdik júıeleri kúsheıtilgen. Máselen, beınebaqylaý arqyly mektepke kirip-shyqqandar qadaǵalaý júıelerimen qamtylǵan. Sondaı-aq ár synyp kabınetiniń ishi keń, terezesi úlken. Erekshe balalarǵa arnalǵan jedelsaty jumys isteıdi. Oqýshylarǵa sportpen aınalysýǵa barlyq jaǵdaı bar. Qysqasy, bul joba ár balanyń tolyqqandy damýyna múmkindik beredi.
Beınelep aıtqanda, bilim – ulttyń irgetasy bolsa, al «Keleshek mektepteri» sol irgetasty nyǵaıtatyn basty tirek. Dálireginde, Keleshek mektepteri – bolashaqqa bastaıtyn altyn kópir. Bul – ulttyń ıntellektýaldy áleýetin kóterip, eldiń damý qarqynyn jedeldetetin basty kúsh. Ár balaǵa sapaly bilim berip, teń múmkindik jasaǵan eldiń bolashaǵy qashanda jarqyn bolmaq.
Medet SEITBEK,
Jezqazǵan qalasyndaǵy №12 jalpy bilim beretin mektep dırektory
Ulytaý oblysy