Qazaqstanda balalardyń joldaǵy qaýipsizdigin arttyrýǵa baǵyttalǵan birqatar profılaktıkalyq is-sharalar júzege asyrylyp keledi. Bul týraly Ortalyq kommýnıkasııalar qyzmetinde ótken baspasóz máslıhatynda QR IIM Ákimshilik polısııa komıtetiniń tóraǵasy Qaısar Sultanbaev málimdedi, dep jazady Egemen.kz.
Onyń aıtýynsha, jol-kólik jaraqattarynyń aldyn alý maqsatynda júrgizilip jatqan aksııalarmen qatar, balalardyń joldaǵy qaýipsizdik daǵdylaryn qalyptastyrý máselesi de mańyzdy bolyp otyr. Osy rette qazaqstandyq tájirıbe halyqaralyq tájirıbemen salystyrylyp, aıyrmashylyqtar anyqtaldy. Negizgi másele – mektep baǵdarlamalarynda jol qozǵalysy erejelerin oqytýǵa bólingen saǵattyń tym azdyǵy.
Osyǵan baılanysty Ishki ister mınıstrligi mektep baǵdarlamasyna jol qozǵalysy erejelerin jeke, mindetti pán retinde engizýdi usynyp otyr.
«О́z kezeginde, mundaı sabaqtar arqyly joldarda zańǵa baǵynatyn minez-qulyq normalaryn sińirip, ózi júrgizýshi bolǵan kezge deıin eseıgen saıyn jol qaýipsizdigine jaǵymdy áser etedi. Balalardyń jol kólik jaraqatynyń aldyn alýda eń myqty quraldardyń biri – jas jol ınspektorlar jasaǵynyń qyzmetin uıymdastyrý. Dúnıejúziniń kóptegen elinde mektep oqýshylaryn jol qaýipsizdigi máselelerine tartý ıdeıasy uzaq ýaqyttan beri bilim berý jáne qoǵamdyq mádenıetiniń bir bóligine aınalyp keledi. Halyqaralyq tájirıbe kórsetkendeı, mundaı bastamalar joldaǵy jaraqat qaýipin tómendetedi jáne óskeleń urpaq arasynda azamattyq jaýapkershilik sezimin qalyptastyrady», dedi Qaısar Sultanbaev.
Qazaqstan da óz modelin birtindep qalyptastyryp keledi. Máselen, osy aıdyń basynda О́skemende Ǵ.Baıtasov atyndaǵy XX respýblıkalyq jáne memleketaralyq slıot uıymdastyrylyp, oǵan elimizdiń barlyq aımaqtarynan jáne Qyrǵyzstannan 200-den astam oqýshy qatysqan. Degenmen, bul kórsetkishtiń artynda áldeqaıda aýqymdy qozǵalys tur. Elimiz boıynsha 70 myńnan astam bala jas jol ınspektorlarynyń qataryna tartylǵan. Bul Qazaqstandaǵy 3,5 mıllıon oqýshynyń aıasynda óte mańyzdy úles.
«Mundaı jobalar qaýipsizdikke tikeleı áser etedi. Qazaqstandaǵy jas jol ınspektorlar qozǵalysy – bul mekteptegi úıirme ǵana emes. Bul jasóspirimderdi áleýmettik mańyzdy qyzmetke tartýdyń formasy, onda ár bala ınteraktıv jáne oıyn formatynda jol erejelerin úırenedi, jaýapkershilik sezimin damytady jáne óz qurdastary arasynda qaýipsiz minez-qulyq mádenıetiniń kóshbasshysyna aınalady», delingen habarlamada.
Vision Zero jahandyq tujyrymdamasy boıynsha, 2050 jylǵa qaraı jol apatynan bolatyn bala ólimin tolyq joıý maqsaty qoıylǵan.