Ulttyq bank 2026 jyldyń alǵashqy toqsanynan bastap kásipkerlerdiń shottan aqsha alý erejesin ózgertedi. Qujat «Ashyq NQA» portalynda jarııalandy, dep jazady Egemen.kz.
Jańa talapqa saı, kásipker banktegi shotynan qarajat alǵan kezde onyń naqty maqsatyn kórsetýi kerek bolady. Ulttyq bank bul qadamdy jańa Salyq kodeksine sáıkestendirý úshin jasalyp otyrǵanyn aıtady. Maqsat – qolma-qol aqsha alý prosesin barynsha ashyq etý.
Regýlıatordyń aıtýynsha, bul bızneske kedergi keltirmeıdi ári ekonomıkalyq belsendilikke keri áser etpeıdi.
Degenmen qujattyń tolyq nusqasy ázirge jarııalanbaǵan, portalǵa tek qysqasha mazmuny ǵana shyǵarylǵan.
Aıta ketsek, 2025 jyldyń sáýirinde elde qolma-qol aqsha alý kólemi keıingi segiz jyldaǵy eń tómengi deńgeıge túsken edi. Al jalpy berilgen kredıtterdiń qaryz qaldyǵy búginde 45,7 trln teńgege jetken.