28 aqpan kúni óńir basshysy Nurdáýlet Qılybaıdyń tapsyrmasyna sáıkes Ystanbul qalasyna barǵan Mańǵystaý oblysy ákiminiń orynbasary Abbat О́risbaev birqatar kelisimge qol jetkizdi, dep habarlaıdy Egemen.kz Mańǵystaý oblysynyń baspasóz qyzmetine silteme jasap.
Atap aıtsaq, 100 mańǵystaýlyq stýdent Túrkııanyń Antalııa jáne Marmarıs qalalarynda týrızm salasy boıynsha tegin taǵylymdamadan ótedi. Sonymen qatar, 50-ge jýyq dáriger Medicana Health Group klınıkasynda kásibı biliktiligin jetildiredi.
Mańǵystaý oblystyq Bilim basqarmasy men Túrkııanyń «Kýrorttyq Aımaq» týrıstik qyzmet saýdasy AQ arasynda jasalǵan memorandým aımaqtaǵy týrızm jáne servıs salasyna bilikti mamandar daıarlaýdy kózdeıdi. Osy kelisim aıasynda maýsym aıynan bastap Marmarıs qalasyndaǵy Woxx Hotels Group 50 stýdentti oqytyp, tájirıbe almasýǵa múmkindik beredi. Taǵy 50 stýdent Antalııada kásibı bilimin jetildiredi. Barlyq taǵylymdamashylar tegin tamaqpen qamtamasyz etilip, olarǵa aılyq tólenedi.
Sondaı-aq, oblys ákiminiń orynbasary Medicana Health Group basqarma múshesi Berk Bozkýrtpen kelissózder júrgizip, áriptestik ornatý týraly kelisimge keldi. Bul kelisim aıasynda 20 onkolog jáne oblystyń ár medısınalyq uıymynan 30-ǵa jýyq dáriger túrli medısınalyq baǵyttar boıynsha tájirıbe jınaqtaıdy.
Medicana Health Group – Túrkııanyń jetekshi medısınalyq uıymdarynyń biri. Quramyna 14 aýrýhana, 11 medısınalyq ortalyq jáne 500-den astam emhana kiredi. Jyl saıyn 10 mıllıonnan astam naýqasqa qyzmet kórsetetin bul top joǵary tehnologııalyq emdeý ádisterin usynatyn medısınalyq týrızm salasynyń kóshbasshysy retinde tanymal.