Astanada Astana 2025 World Boccia Challenger halyqaralyq týrnıriniń resmı jabylý rásimi ótti. Qazaqstan quramasy jalpy sany alty medal jeńip alyp, álemdik sport sahnasynda óz áleýetin taǵy bir márte dáleldedi, dep habarlaıdy Egemen.kz.
Bul doda – elimizde BISFed qamqorlyǵymen uıymdastyrylǵan alǵashqy halyqaralyq bochcha jarysy. Týrnır 2028 jylǵy Los-Andjeles Paralımpıadasyna irikteý mártebesine ıe bolyp, oǵan 12 memlekettiń 56 sportshysy jınaldy.
Bochchanyń halyqaralyq federasııasy (BISFed) ókilderi jarystyń joǵary deńgeıde ótkenin atap ótti. Olardyń aıtýynsha, mundaı kólemdegi týrnır eldiń ınklıýzıvti sportty damytyp, halyqaralyq yntymaqtastyqqa jol ashyp otyrǵanyn kórsetti. Qazaqstan parasporttaǵy aýqymdy sharalardy qabyldaýǵa daıyn ekendigin dáleldedi.
«Astana World Boccia Challenger týrnıri Qazaqstan úshin tarıhı oqıǵa boldy, elimizde alǵash ret osyndaı deńgeıdegi jarys uıymdastyryldy. 12 memleketten kelgen 56 úzdik sportshy joǵary sheberlik pen sporttyq kúsh-jigerin tanytty. Qazaqstan bochcha federasııasy atynan barlyq jeńimpazdar men júldegerlerdi quttyqtaımyn! Bizdiń quramamyz úshin bul bastaý aıryqsha mańyzǵa ıe. Biz parasportshylarymyzǵa sendik, olar barlyq úmitti aqtady. Bul jeńis bizge shabyt berip, eldegi ınklıýzıvti sporttyń jańa belesterin ashady», dedi Parlament Senatynyń tóraǵasy, Qazaqstan bochcha federasııasynyń prezıdenti, Máýlen Áshimbaev.
Ol sóziniń sońynda tóreshilerge, bapkerler men ata-analarǵa, eriktiler men demeýshilerge rızashylyǵyn bildirdi.
Segiz kúnge sozylǵan týrnırde sportshylar tek medal úshin ǵana emes, naǵyz erik-jiger men sheberlikti pash etti. Qazaqstandyq atletter nátıjeli óner kórsetip, eki altyndy (Itıana Shyńǵyshanova, Baljan Bólekpaeva), eki kúmisti (Azamat Aıazbaev, Erhat Almat), bir qola medaldi (Elmıra Mýsralıeva) jáne aralas juptyq synda altyndy (Elmıra Mýsralıeva – Azamat Aıazbaev) jeńip aldy.
Fınaldyq saıystarda aralas juptyq BC4 sanatynda qazaqstandyq dýet Mýsralıeva – Aıazbaev ırandyq qarsylastaryn tize búktirip, chempıon atandy. Al komandalyq BC4 jarysynda Koreıa quramasy birinshi orynnan kórindi. BC3 juptyq synda da ońtústikkoreıalyq sportshylar top jaryp, Italııa men Úndistandy artta qaldyrdy.
Astana 2025 World Boccia Challenger týrnırin Qazaqstan bochcha federasııasy Týrızm jáne sport mınıstrligi, Sport Qory qory, «Samuryq-Qazyna» AQ, ERG jáne ózge de seriktesterdiń qoldaýymen ótkizdi. Bul seriktestik jarystyń tabysty ótýine aıryqsha yqpal etti.
Týrnırdiń Astanada ótýi tek sportshylar úshin ǵana emes, Qazaqstannyń parasporttyq júıesi úshin de mańyzdy kezeńge aınaldy.