Astanada júzege asyrylyp jatqan Smart City / Smart Astana jobasy elordany óńirdegi eń qaýipsiz ári tehnologııalyq turǵyda damyǵan qalalardyń qataryna qosýǵa baǵyttalǵan, dep habarlaıdy Egemen.kz.
Jobanyń negizgi seriktesi – BAÁ-niń Presight AI kompanııasy. Naryqtyq kapıtalızasııasy $5 mlrd bolatyn bul kompanııa jasandy ıntellekt pen Big Data salasynda aımaqtyq kóshbasshy sanalady. Dýbaı men Abý-Dabıdi álemdegi eń qaýipsiz qalalardyń qataryna qosqan tájirıbe endi Astanada qoldanylyp jatyr.Joba aıasynda táýlik boıy jumys isteıtin sıtýasııalyq ortalyq qurylady. Ol beınebaqylaý, kólik, TKSh jáne qoǵamdyq qaýipsizdik salalaryn biriktiretin 15-ten astam júıeni qamtıdy. Jyl sońyna deıin qalada 15 myńnan astam kamera ornatylyp, olar 35-ten astam jasandy ıntellekt algorıtmderimen jumys isteıtin bolady. Júıe adamdardyń is-áreketin tanýǵa, kólik qozǵalysyn baqylaýǵa, jol erejesin buzýshylyqtardy tirkeýge múmkindik beredi.
Qala turǵyndary úshin paıdasy
Quqyqbuzýshylyqtarǵa áreket etý ýaqyty 30–50%-ǵa qysqarady; Jol qaýipsizdigi kúsheıedi, apattardyń aldyn alý júıesi engiziledi; Balalardyń qaýipsizdigi úshin mektepter men aýlalarǵa «aqyldy» kameralar qoıylady; Qaýipsizdik tek ortalyqta ǵana emes, shetki aýdandarda da birdeı qamtamasyz etiledi.Bul faktorlar jyljymaıtyn múlik baǵasyna tikeleı áser etip, qala shetterindegi yqshamaýdandardy da ınvestorlar úshin tartymdy etedi.
Áleýmettik saýalnama nátıjeleri kórsetkendeı:
85% turǵyn balalardyń qaýipsizdigin basty basymdyq dep sanaıdy; 91% barlyq beınebaqylaý júıesin ortalyqtandyrýdy qoldaıdy; 51% jol apattarynyń sanyn azaıtýdy mańyzdy dep kórsetken; 46% qala shetterin tolyq qamtýdy qajet dep esepteıdi.Astana qalasy Sıfrlandyrý basqarmasynyń basshysy Berik Ahmetovtiń aıtýynsha, joba maqsaty tek kamera ornatý emes, qalany basqarýdyń biryńǵaı sıfrlyq arhıtektýrasyn qurý. Al Presight AI Kazakhstan ókilderi jumystyń 60%-ǵa jýyǵyn qazaqstandyq IT-kompanııalar atqaratynyn, bul salada jańa jumys oryndary men quzyretterdiń qalyptasatynyn atap ótti.Smart Astana – tek tehnologııalyq joba emes, qoǵam suranysyna jaýap beretin strategııalyq sheshim. Ol elordanyń ınvestısııalyq tartymdylyǵyn arttyryp, qaýipsizdik pen jaılylyqtyń jańa standartyn ornatady.