Jıynda Memleket basshysy 2019 jyldan beri kezeń-kezeńimen birneshe saıası reforma júrgizilip, saıası júıeniń dáıekti túrde jańǵyrtylǵanyn atap ótti, dep habarlaıdy Egemen.kz.
Sonymen qatar Prezıdent osy zalda otyrǵan azamattardyń kóbi sol úlken ózgeristerdiń bel ortasynda júrgenin de aıtty.
«Ashyǵyn aıtqanda, biz birshama kedergige tap boldyq. Saıası ortanyń belgili bir bóligi qoǵamdy jańǵyrtýdy kózdeıtin bastamalarymyzǵa kúmánmen qarady, tipti qabyldaı almady. Búginde biz tańdaǵan strategııalyq baǵyttyń durys ekenine kózimiz jetti. Bul elimizdi órkenıetti qoǵam qurý jolyna bastaıdy. 2022 jyly ótken referendým ultymyzdy buryn-sońdy bolmaǵan deńgeıde uıystyryp, memleket aldyndaǵy strategııalyq mindetterdiń tóńiregine toptastardy. Azamattarymyzdyń jańa saıası baǵdardy biraýyzdan qoldaýy alǵa ilgerileýden basqa jol joq ekenin aıqyn kórsetti», dedi Qasym-Jomart Toqaev.
Memleket basshysy tarıhı ólshem turǵysynan óte qysqa ýaqyt ishinde qoǵam saıası kemeldik pen azamattyq jaýapkershilikti kúsheıtetin irgeli ózgeristerdi bastan ótkergenin atap ótti.
«Ádiletti Qazaqstandy qurý prosesin endi eshkim toqtata almaıdy. О́tkenge oralýǵa, eń aldymen, elimizdiń jastary jol bermeıdi. Bilimdi jas urpaq keleshekke kóz tigedi. Olar Qazaqstandy jańa zamannyń talabyna saı keletin órkenıetti memleket retinde kórgisi keledi», dedi Prezıdent.