Úkimette vıse-premer – ulttyq ekonomıka mınıstri Serik Jumanǵarınniń jetekshiligimen Ulttyq aýyl sharýashylyǵy sanaǵynyń barysy talqylandy, dep habarlaıdy Egemen.kz.
Ulttyq statıstıka bıýrosynyń dereginshe, 2025 jylǵy 28 tamyzdaǵy jaǵdaı boıynsha Sanaq.gov.kz portalynda 236,9 myń aýyl sharýashylyǵy qurylymy tirkelgen. Sonyń ishinde 226,2 myńy nemese jospardaǵy kórsetkishtiń 85,3%-y saýalnamany toltyrǵan. Jalpy aýyl sharýashylyǵy óndirýshileriniń 75,4%-y esep berse, olardyń 82,2%-y naqty jumys istep turǵan sýbektiler.Bıýro basshysy Maqsat Turlybaev sanaqqa barlyq sharýashylyq engizilgen, onyń ishinde sońǵy jyldary esh málimet bermegenderi de bar ekendigin atap ótti. Mundaı kásiporyndardyń sany 13 myńnan asady (barlyq tizimniń 4,5%-y). Al jeke qosalqy sharýashylyqtardan 277,9 myń úı sharýashylyǵy saýalnamaǵa qatysyp, bul josparlanǵan mejeden 1,5 ese kóp kórsetkishke jetken. Eń belsendi óńirler qatarynda Qostanaı, Soltústik Qazaqstan jáne Batys Qazaqstan oblystary bar. Kerisinshe, Túrkistan men Qaraǵandy oblystarynda jáne respýblıkalyq mańyzy bar qalalarda qatysý deńgeıi tómen. Osyǵan baılanysty uıymdasqan sharýashylyqtar úshin onlaın kezeńdi 20 qyrkúıekke deıin uzartý usynylǵan. Bul tolyq qamtýdy qamtamasyz etip, oflaın kezeńge zııan tıgizbeý úshin jasalyp otyr.Aıta keteıik, onlaın kezeńge sharýalar qyzyǵýshylyq tanytqanyn jáne birqatar óńirlerde statıstıkterdiń ákimdiktermen tıimdi baılanys ornata alǵanyn kórsetken.
«20 qyrkúıekten bastap eń jaýapty kezeń – dalalyq sanaq bastalady. Ol bir aıǵa sozylyp, 20 qazanda aıaqtalady. Bul ýaqytta ıntervıýerler sharýashylyqtarǵa baryp, jeke suhbat arqyly derekter jınaıdy. Osy kezeńde senimdi qarym-qatynas ornatyp, barynsha naqty aqparat alý qajet», dedi Maqsat Turlybaev.
Jıyn sońynda Serik Jumanǵarın onlaın kezeńdegi sharýalardyń joǵary belsendiligine rızashylyq bildirdi.
«Bárimiz aýyl sharýashylyǵyndaǵy statıstıkany retke keltirýdiń qanshalyqty mańyzdy ekenin jaqsy túsinemiz. Buǵan memlekettik qoldaý sharalary, salanyń damý josparlary, salyq túsimderiniń boljamy jáne basqa da máseleler baılanysty. Onlaın kezeńde sharýalardyń joǵary belsendiligi qýantty. Dalalyq jumysta da jaqsy nátıjeler kútemin», dedi vıse-premer.