Sát saıyn qubylatyn sán ındýstrııasynda adam shashynyń materıal retinde paıdalanyla bastaýy bertinde ǵana beleń alǵan bolatyn. Shashylyp jatatyn shash bitkendi aldymen kádege jaratqan aǵylshyndar edi. Qaıbir jyldary «Arla» kompanııasy er adamnyń tós júninen ishik tigip, ony 4 myń AQSh dollaryna sátti saýdalaǵan-tyn. Odan soń, 2010 jyly vetnamdyq dızaınerler 1 mıllıon metr adam shashynan kóılek qurap shyǵyp, aıdy aspanǵa taǵy bir márte shyǵarǵany bar. Mine, osyndaı tájirıbelerdiń izin ala bizdiń sángerler de bilek sybana iske kirisip, jýyrda adam shashynan ishik tigip shyǵaramyz, dep jahanǵa jar saldy.
Rıza Saltaýbaevanyń atelesi Astanadaǵy sán salondarynyń birine sarǵylt jáne qara tústi shash jınap berýge tapsyrys túsiripti. Dál osylaı dep «Ekspress K» basylymy jazady. Qajetti mólsherdegi shash jınalǵan soń, Rıza dereý iske kirisedi. Ol shashtan tigilgen ishikti ınternettegi «Ebay» aýksıony arqyly satylymǵa shyǵarǵaly otyrǵanyn da málimdepti. Jáne jańa ton úshin 3 myń AQSh dollarynan kem aqsha suramaıtynyn taǵy jetkizgen.
Jýyrda almatylyq bir shashtaraz áleýmettik jelilerdiń birindegi jeke paraqshasynda asqan yjdahattylyqpen tigilgen daıyn ishiktiń sýretin jarııalady. Al mundaı batyl oıdyń basy-qasynda júrgen almatylyq tabıǵat qorǵaýshylardyń aıtýynsha, osy shara arqyly baǵaly ishikke bola jan-janýarlardy aıaýsyz qyratyn jurtshylyqtyń nazaryn taǵy bir márte aýdartýǵa múmkindik aldyq deıdi.
Eger osy oı sátti júzege assa, onda shashtan tigilgen ishik Qazaqstanda sánge aınalyp, shashtarazdar shash satý bıznesine shyndap kirisetindeı me, qalaı?!
Amangeldi QIIаS,
«Egemen Qazaqstan».