Memleket basshysy Qasym-Jomart Toqaev qazaqstandyqtardy Konstıtýsııa kúnimen quttyqtady, dep habarlaıdy Aqordanyń baspasóz qyzmeti.
Memleket basshysy Qasym-Jomart Toqaevtyń Konstıtýsııa kúnimen quttyqtaýy jarııalandy. Prezıdenttiń sózinshe, osydan 30 jyl buryn ótken referendýmda halqymyz Ata zańyn qabyldap, tarıhı tańdaýyn jasady.
— Qurmetti otandastar! Barshańyzdy Konstıtýsııa kúnimen quttyqtaımyn! Osydan 30 jyl buryn ótken referendýmda halqymyz Ata zańyn qabyldap, tarıhı tańdaýyn jasady. Konstıtýsııamyz Qazaqstan Respýblıkasy táýelsizdiginiń, qazaq memlekettiliginiń berik tuǵyryna aınaldy. Onda ultymyzdyń búginin jáne bolashaǵyn aıqyndaıtyn myzǵymas qundylyqtar men qaǵıdattar naqty kórinis tapty. Ata zań Qazaqstannyń barlyq azamatynyń múddesin ultyna, dinine qaramastan birdeı qorǵaıtyn áleýmettik memleket retindegi quqyqtyq irgetasyn qalyptastyrdy. Konstıtýsııa qoǵamdyq kelisim men ishki turaqtylyqtyń basty kepili sanalady. San túrli saladaǵy jetistikterge osy negizgi zańymyzǵa súıene otyryp qol jetkizdik. Úsh jyl buryn el damýynyń jańa tarıhı kezeńindegi mindetterge sáıkes, aýqymdy konstıtýsııalyq reforma jasaldy. Onyń basty nátıjesi — saıası júıeniń «Kúshti Prezıdent — yqpaldy Parlament — esep beretin Úkimet» tujyrymdamasynyń negizinde jańǵyrýy. Konstıtýsııalyq reformada adam quqyqtaryn qorǵaýǵa, Zań men tártip ústemdigin ornyqtyrýǵa basa mán berildi. Ata zańǵa álemdik tájirıbede buryn-sońdy bolmaǵan, ınnovasııalyq sıpattaǵy birqatar jańa ereje engizildi, — dedi Toqaev.
Qasym-Jomart Toqaev Qazaqstannyń konstıtýsııalyq reformasyna Venesııa komıssııasy jáne ózge de bedeldi halyqaralyq uıymdar, sondaı-aq sheteldik sarapshylar oń baǵasyn bergenin aıtty.
— Ádiletti, Taza, Qýatty ári Qaýipsiz Qazaqstan quramyz desek, azamattarymyz Ata zańdy qurmettep, onyń barlyq erejesin múltiksiz saqtaýy kerek. Qazaqstan Respýblıkasynyń strategııalyq maqsattaryna ultymyzdy jumyldyratyn Konstıtýsııamyzdyń aıasynda barsha azamatymyzdyń Otanymyzdy órkendetý úshin jasampazdyqpen eńbek etýine barlyq jaǵdaı jasalǵan. Elimizdiń barsha azamatyna zor densaýlyq, baq-bereke tileımin! — dedi Prezıdent.