Memleketimizdiń mereıli merekesi Qazaqstan Respýblıkasy Konstıtýsııasynyń 30 jyldyǵyna oraı Talǵar aýdandyq ortalyq aýrýhanasynda «Ashyq esik kúni» ótti, dep jazady Egemen.kz.
Is-sharaǵa «A-Class Medical» basqarýshy kompanııasynyń ókilderi jáne aýrýhana dırektory Maıra Ábdihalyqqyzy qatysyp, turǵyndardyń deniniń saýlyǵy – elimizdiń basty baılyǵy ekenin aıryqsha atady. Osy maqsatta aýdandaǵy medısına salasyn jetildirip, halyqqa qoljetimdiligin arttyrý jolynda birqatar oń qadamdar jasalyp jatqandyǵyn da tilge tıek etti.
«Talǵar aýdandyq ortalyq aýrýhanasy árdaıym dáleldi medısına qaǵıdattaryna jáne ǵylymı negizdelgen hattamalarǵa saı zamanaýı klınıkalyq tásilderdi engize otyra, bekitilgen turǵyndardyń densaýlyǵyn nyǵaıtýǵa erekshe kóńil bólýde. Búgingi «Ashyq esik kúni» aýdan turǵyndary men medısınalyq uıym arasyndaǵy ashyq dıalogty nyǵaıta otyryp, azamattardyń densaýlyǵyn tekserip, medısınalyq keńester berilýde», – dedi mekeme basshysy.
Is-shara aıasynda bekitilgen turǵyndar aldyn ala jazylýsyz jáne joldamasyz aýrýhananyń jetekshi mamandarynyń qabyldaýyna kelip, tekserilip, keńes aldy. Olardy aýrýhananyń bilikti dárigerleri, nevropatolog Erlan Bektemirov, kardıolog Dıana Dosbaeva, terapevt Ulan Sultanmuratov jáne endokrınolog Roza Dosmuhanova qabyldady.
«Qazir dárigerge barý úshin aldyn ala jazylyp, aptalap áýirelenip júretinimiz jasyryn emes. Konstıtýsııa kúnine oraı uıymdastyrylǵan bul merekelik shara barysynda medısına qyzmetkerleriniń turǵyndarǵa erekshe kóńil bólgenin sezindik. О́zim kardıologtan keńes alǵanyma qýanyp otyrmyn», – deıdi qala turǵyny Jaqsylyqova.
Dárigerlerdiń qabyldaýyna kelgen árbir turǵyn mamandardan ózderin qyzyqtyrǵan suraqtaryna jaýap alyp, aýrýlardyń aldyn alý men emdeý boıynsha usynystar aldy. Máselen, salaýatty ómir salty qaǵıdattaryn túsindirilip, júrek-qan tamyrlary jáne endokrınologııalyq aýrýlardyń, ınsýlt pen ınfarkttiń aldyn alý jáne erte anyqtaý boıynsha keńester berilip, halyqty ambýlatorlyq jáne stasıonarlyq kómek alý múmkindikteri jóninde qulaǵdandyrdy.
Almaty oblysy.