Jerde G3 deńgeıine jetetin kúshti magnıttik daýyldar bastaldy. Bul týraly Reseı ǵylym akademııasynyń Ǵaryshtyq zertteýler ınstıtýtynyń Kún astronomııasy zerthanasy málimdedi, dep jazady Egemen.kz RIA agenttigine silteme jasap.
«Jer betinde ǵalamdyq stansııalar jelisiniń málimeti boıynsha, planetalyq masshtabtaǵy magnıttik daýyldar resmı túrde bastaldy. Aldaǵy saǵattarda geomagnıttik kórsetkishtiń ósetini sózsiz, óıtkeni keıbir stansııalar G2-G3 daýyldary týraly málimetterdi alyp jatyr», delingen habarlamada.
Polıarlyq jaryqtardyń negizgi aımaǵy Skandınavııa elderi men Kanadada qalyptasatyny atap ótildi.
Buǵan deıin ǵalymdar Kún betinde eki ret plazmanyń tastalǵanyn jáne juldyzda qýatty jarqyldyń bolǵanyn habarlaǵan edi. Alǵashqy ortasha kólemdegi plazma bulty Merkýrıı men Sholpanǵa qaraı baǵyttalsa, ekinshisi týra Jerge bet alǵan. Dál osy ekinshi bult magnıtti daýyl týdyrýy tıis bolatyn.
Mundaı qubylystar energetıkalyq júıelerdiń jumysyna kedergi keltirip, qustar men janýarlardyń qonys aýdarý joldaryna da áser etedi. Al qýatty daýyldar qysqa tolqyndy baılanystardyń úzilýine, navıgasııalyq júıelerdiń aqaýyna jáne óndiristik jelilerdegi kerneýdiń turaqsyzdyǵyna sebep bolýy múmkin. Degenmen, magnıtti daýyldardyń adam densaýlyǵyna naqty áseri bar-joǵy týraly ǵylymda ázirge birjaqty tujyrym jasalǵan joq.