Memleket basshysy Qasym-Jomart Toqaevtyń Qytaıǵa sapary aıasynda Beıjińde Qazaqstannyń mádenıet ortalyǵy saltanatty túrde ashyldy, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy ortalyqtyń paıdalanýǵa berilýin qos halyqtyń rýhanı ómirindegi óte mańyzdy kún dep baǵalady.
«Muny, shyn máninde, tarıhı oqıǵa deýge bolady. Bul – qazaqtyń qytaı halqyna degen rııasyz kóńili. Sondaı-aq qytaı jurtynyń qazaqqa bildirgen dostyq peıili. Eń aldymen, osy bastamaǵa qoldaý kórsetkeni úshin asa qadirli Tóraǵa Sı Szınpın myrzaǵa zor alǵys aıtamyn. Qytaı eliniń Mádenıet jáne týrızm mınıstri Sýn Elı myrzaǵa, sondaı-aq osy iske atsalysqan barsha qytaı jáne qazaq azamattaryna shynaıy rızashylyǵymdy bildiremin. Osy saltanatty jıynǵa meniń qytaılyq eski dostarym, dıplomattar, kezinde maǵan sabaq bergen ustazym Lıý Shısın myrza jáne zııaly qaýym qatysyp otyr. Barshańyzǵa ystyq yqylasymdy bildiremin. Mádenı-gýmanıtarlyq baılanysymyz berik bolsa, dostyǵymyz da nyǵaıa túsedi. О́ner men mádenıet – túrli halyqtyń arasyn jalǵaıtyn altyn kópir», dedi Qasym-Jomart Toqaev.Prezıdent byltyrdan beri Astanada Beıjiń til jáne mádenıet ýnıversıtetiniń fılıaly jumys isteı bastaǵanyn jetkizdi.
Al Qytaıǵa jasaǵan osy sapary aıasynda elimizde Lý Ban zerthanasynyń ekinshi jáne úshinshi ortalyqtary ashyldy.
«Jalpy, Qazaqstan men Qytaı arasyndaǵy qarym-qatynas óte joǵary qarqynmen damýda. Biz yntymaqtastyqtyń ekinshi «Altyn 30 jyldyǵyna» qadam bastyq. Joǵary deńgeıdegi kezdesýler men kelissózder jyl saıyn tıimdi ótkizilýde, ekijaqty saýda kólemi ulǵaıýda. Byltyr eki eldiń taýar aınalymy 44 mıllıard dollarǵa jetti. Bul – tarıhymyzda buryn-sońdy bolmaǵan eń joǵary kórsetkish. Bıyl da ózara saýda qarqyny tómen bolmaıdy degen boljam bar. Investısııalyq qarym-qatynas ta oıdaǵydaı damýda. Jalpy, Qytaı Qazaqstannyń eń iri saýda-ınvestısııalyq seriktesi bolyp sanalady. Halyqaralyq máseleler boıynsha qos eldiń ustanymdary uqsas nemese birdeı dep kúmánsiz aıtýǵa bolady. Osynyń bári Qazaqstan men Qytaı máńgi strategııalyq seriktester ekenin aıqyn kórsetedi. Bul úrdis halqymyzdyń ulttyq múddesine saı keledi», dedi Memleket basshysy.