«Qazmedıa» ortalyǵynda «Aýyl» partııasy men Parlamentarızm ınstıtýtynyń uıytqy bolýymen «Qazaqstan Respýblıkasynyń Konstıtýsııasy: memleketshildikti nyǵaıtýdyń jáne quqyq ústemdiginiń 30 jyly» taqyrybynda halyqaralyq sarapshylyq kezdesý ótkizildi.
Kezdesýge Májilis depýtattary, jetekshi zańger-ǵalymdar, saıasattanýshylar men Qazaqstan, Reseı jáne Qyrǵyzstannyń qoǵamdyq ınstıtýttary ókilderi qatysty.
Kezdesýdiń maqsaty – Konstıtýsııanyń memleketshildikti nyǵaıtýdaǵy rólin saraptamalyq turǵyda paıymdaý, 2022 jylǵy referendýmnyń qorytyndylaryn taldaý jáne reformalardyń quqyqtyq júıeniń damýyna yqpalyn baǵamdaý boldy. Qatysýshylar ulttyq konstıtýsııalyq negizderdi ozyq halyqaralyq tájirıbemen ushtastyrý qajettigine aıryqsha nazar aýdardy.
Talqylaýlardyń basty ózegi Konstıtýsııanyń memlekettiń quqyqtyq negizi ári saıası jańǵyrtýdyń negizgi quraly retindegi róli boldy.
Otyrysta Parlamentarızm ınstıtýtynyń dırektory Natalıa Pan atap ótkendeı, elimizdiń Konstıtýsııasy bılik tarmaqtarynyń bólinisin bekitip qana qoımaı, myqty parlamentarızmdi damytýǵa jaǵdaı jasady. Eń mańyzdy ózgerister qatarynda ol Senattyń negizgi memlekettik laýazymdarǵa taǵaıyndalatyn kandıdatýralardy kelisý jónindegi ókilettikterin keńeıtýdi, zań shyǵarý rásimderi men Parlament qurylymyn qaıta qaraýdy, bıýdjet prosesterine parlamenttik baqylaýdy engizýdi, Joǵary aýdıtorlyq palatany qurýdy jáne aralas proporsıonaldy-majorıtarlyq saılaý júıesine kóshýin atady. Onyń aıtýynsha, bul reformalar parlamentarızm rólin kúsheıtip, memlekettik basqarý júıesine qoǵam senimin arttyrdy.
«Sondaı-aq Konstıtýsııa – quqyqtyń ústemdigin, saıası plıýralızmdi, bıliktiń bólinýin jáne adam quqyqtaryn qurmetteýdiń basty qaǵıdattaryn jasaı otyryp, memlekettik evolıýsııanyń baǵytyn anyqtady. Konstıtýsııa tıimdi ınstıtýttardyń, turaqty quqyqtyq júıeniń jáne ekonomıkalyq qaıta qurýlardyń jumys isteýine, sondaı-aq ishki turaqtylyqty nyǵaıtýdyń negizin qalyptastyrdy», dedi N.Pan.
Al «Aýyl» partııasynyń tóraǵasy, Májilis depýtaty Serik Egizbaev elimizdiń Ata zańy eń aldymen Qazaqstannyń jańa damý baǵytyn, demokratııalyq jáne zaıyrly memleket retindegi bolmysyn aıqyndap bergenin atap ótti. Sonymen qatar memlekettik bılik bólinisi, azamattardyń quqyqtary men bostandyqtary, menshikke qol suqpaý prınsıpteri elimizdiń basty zańy arqyly bekitilgenin aıtty.
Partııa tóraǵasy S.Egizbaev Konstıtýsııamyz 2022 jyly jańa dáýirge beıimdelip, reformalanǵanyna toqtaldy.
«Konstıtýsııanyń 33 babyna ózgeris engizildi. «Kúshti Prezıdent – yqpaldy Parlament – esep beretin Úkimet» qaǵıdasynyń naqty iske asýy elimizdegi tarıhı ózgeristerdiń bastaýy boldy.
Prezıdenttiń qandaı da bir partııadan tys bolýy jáne munyń konstıtýsııalyq zań arqyly bekitilýi elimizde demokratııanyń damýyna jol ashty dep senimmen aıta alamyz. Qazirgi Parlament májilisiniń quramyn buǵan naqty mysal retinde kórsetýge bolady. 8 shaqyrylymdaǵy Parlament májilisinde 6 partııa ókilderimen birge, bir mandatty okrýgterden saılanǵan depýtattar bar. Bul elimizdiń tarıhynda buryn-sońdy bolmaǵan óte mańyzdy ózgeris. «Aýyl» partııasy 25 jyldyq tarıhynda Prezıdent bastaǵan konstıtýsııalyq reformalardyń nátıjesinde tuńǵysh ret Parlamenttik partııa boldy», dedi Májilis depýtaty.
Osylaısha, Astanada ótken halyqaralyq sarapshylyq kezdesý Ata zańnyń 30 jyldyǵy aıasynda memleetimizidiń konstıtýsııalyq damýynyń bolashaǵyn talqylaýdyń mańyzdy alańyna aınaldy.