Májilis depýtaty Aıtýar Qoshmambetov Úkimet múshelerine joldaǵan saýalynda taýar óndirýshilerdiń jańa reestrine qatysty alańdaýshylyǵyn jetkizdi. Ol zańnyń qabyldanǵanyna birneshe aı ótse de, ony naqty oryndaýǵa qajetti erejeler áli bekitilmegenin atap ótti, dep jazady Egemen.kz.
«Zań qabyldandy, biraq onyń iske asýyna qajetti qaǵıdalar áli kúnge deıin anyqtalmaı otyr. Kásipkerlerge túsinikti erejelersiz jańa reestrge kóshý múmkin emes», dedi depýtat.
Depýtattyń sózinshe, bıylǵy mamyrda Memleket basshysy otandyq ónim óndirýshilerge arnalǵan memlekettik qoldaý tetikterin qaıta qaraýdy kózdeıtin zańǵa qol qoıǵan. Bul zań boıynsha burynǵy ST-KZ jáne ındýstrıaldyq sertıfıkattardyń ornyna birtutas reestr engizilip, memlekettik jáne kvazımemlekettik satyp alýda artyqshylyq berilmek. Alaıda atalǵan reestrdiń erejeleri tolyq pysyqtalmaı, belgisiz kúıde qalyp otyr.
Aıtýar Qoshmambetov reestrdiń ázirlenýi bıznes ókilderimen talqylanǵanyn, eki myńnan astam kásipkerden usynys túskenin, biraq keıinnen qujattyń taǵdyry aıqyn bolmaı qalǵanyn aıtty. Onyń aıtýynsha, qańqasy daıyn reestrdi engizýdiń tehnıkalyq múmkindigi de joq.
«Ýaqyt az, jańa júıe 2026 jyldyń qańtarynan bastap kúshine enýi tıis, biraq daıyndyq jetkiliksiz. Mundaı jaǵdaıda kásiporyndar reestrge tirkele almaı, memlekettik tapsyrystan tys qalýy múmkin», dedi ol.
Sonymen birge depýtat sıfrlyq verıfıkasııa júıesiniń de tolyq jumys istemegenin alǵa tartty. Onyń sózinshe, jasandy ıntellekt negizinde avtomattandyrylǵan tekseris bolýy kerek edi, biraq kóktemde kórsetilgen úlgide bul iske aspaǵan. Ol bul másele sheshilmese, memlekettik satyp alý júıesi men óndiristiń toqtaý qaýpi bar ekenin eskertti.
Qoshmambetovtiń aıtýynsha, qosymsha talaptar da bızneske salmaq túsirýi yqtımal. Máselen, kásiporyndarǵa beınebaqylaý ornatý mindeti júktelgenimen, onyń shyǵynyn kim kóteretini belgisiz. Sondaı-aq shalǵaı aýyldardaǵy ınternet máselesi sheshilmeı tur.
Osyǵan baılanysty ol Úkimetke reestrdiń naqty erejelerin qaıta talqylaýdy, tehnıkalyq operasııalardyń tolyq tizimin bekitýdi, beınekamera ornatý men ınternetke qoljetimdilik jaıyn aıqyndaýdy usyndy. Sondaı-aq jańa júıeni pılottyq rejımde synap kórý qajet ekenin aıtty.
Aıtýar Qoshmambetov bul zańnyń qabyldanýy árbir óndirýshige áser etetinin aıtyp, asyǵystyqqa jol berilmeýi kerektigin eskertti.