Memleket basshysy Qasym-Jomart Toqaevtyń Qytaı Halyq Respýblıkasyna resmı sapary aıasynda Ál-Farabı atyndaǵy Qazaq ulttyq ýnıversıteti bazasynda «Sıfrlyq tehnologııalar jáne robottehnıka» halyqaralyq ınstıtýty men robottehnıka ortalyǵy ashyldy.
Bul joba QazUÝ men Qytaıdyń jetekshi joǵary tehnologııalyq kompanııasy — «Jiangsu Huibo Robotics Technology Co., Ltd.» arasyndaǵy strategııalyq áriptestiktiń nátıjesinde júzege asty. Ashylý rásimi Qazaqstan-Qytaı iskerlik keńesiniń otyrysy barysynda ótti.
Saltanatty is-sharaǵa QazUÝ rektory Janseıit Túımebaev pen «Jiangsu Huibo Robotics Technology Co., Ltd.» kompanııasynyń ókili Lı Ven hanym qatysty. Qos tarap bilim, ǵylym jáne ınnovasııa salasyndaǵy yntymaqtastyqty tereńdetýge ýaǵdalasty.
Jıyn barysynda Instıtýt pen Robottehnıka ortalyǵy týraly arnaıy beınerolık kórsetildi. Jańa ortalyq KazNU Hub aýmaǵynda ornalasqan, jalpy aýdany – 600 sharshy metrdi quraıdy. Jobaǵa 2,5 mln dollar kóleminde ınvestısııa quıylyp, 13 zamanaýı robot ornatylǵan. Munda bakalavrıat, magıstratýra jáne doktorantýra deńgeılerinde «Robottehnıka», «Mehatronıka», «Jasandy ıntellekt» jáne «Zattar ınterneti» baǵyttary boıynsha birlesken baǵdarlamalar júzege asyrylmaq.
Sonymen qatar ǵylymı zertteý jumystary júrgizilip, óndiristik, servıstik jáne bilim berý robottary boıynsha jańa jobalar ázirlenedi. Jasandy ıntellekt pen avtomattandyrý salasynda startaptar men ınnovasııalyq kompanııalardy qoldaý da kózdelgen.
Bul bastama elimizdiń sıfrlyq damý qarqynyn kúsheıtip, memlekettiń halyqaralyq ınnovasııalyq keńistiktegi bedelin arttyrýǵa serpin bermek.