Bıyl elimizdiń túkpir-túkpirindegi 8 myńnan astam bilim uıasy 4 mıllıon oqýshyǵa óz esigin aıqara ashty. Jańa oqý jylyna 83 oqý oshaǵy paıdalanýǵa berildi, sonyń 57-si «Keleshek mektepteri» ulttyq joba aıasynda salynǵan. Bıyl birinshi synypqa 360 myńnan kóp bala bardy, olardyń 72 paıyzy qazaqsha oqýdy tańdady.
Oqý-aǵartý mınıstri Ǵanı Beısembaev osynaý mańyzdy sátpen bilim alýshylardy, pedagogter men ata-analardy quttyqtady. Ol óz sózinde ótken oqý jyly muǵalimder men oqýshylar úshin tolaǵaı tabysqa toly bolǵanyn, el mektepterinde jumys istep júrgen 600 myńǵa jýyq muǵalimniń tynymsyz eńbegi nátıjesinde balalardyń halyqaralyq bilim saıystarynda myńnan asa medal ıelengenin, onyń ishinde 193 altyn baryn, árbir ekinshi qatysýshy elge jeńispen oralǵanyn atap ótti. Onyń aıtýynsha, Memleket basshysy Respýblıkalyq tamyz konferensııasynda pedagogterdiń qoǵamdaǵy róli men mártebesine aıryqsha toqtaldy. Bul qaǵıda búkil qoǵam úshin negizgi baǵdar bolýǵa tıis. Prezıdenttiń qoldaýymen elimizde 3 myńǵa jýyq oqý oshaǵy bir aýysymda bilim beredi. Búginde 232 jańa mektepte qurylys júrgizilip, taǵy 245 ǵımarat renovasııadan ótip jatyr.
«1 qyrkúıekten bastap barlyq bilim berý uıymynda «Adal azamat» birtutas tárbıe baǵdarlamasy jáne «DosbolLIKE» antıbýllıngtik jobasy iske qosylady. Sondaı-aq kezeń-kezeńimen mektepterge biryńǵaı dızaın-kod engiziledi. Jumysshy mamandyqtaryn tańdaǵan stýdentterdiń barlyǵy kolledjderde tegin oqıdy. Otandyq 5 kolledj jetekshi kásiporyndarmen, álemdik bilim berý ortalyqtarymen birlesip jumys isteı bastaıdy. Bizdi alda mańyzdy oqıǵalar kútip tur. Almaty qalasynda Búkilálemdik ınklıýzııa kongresi, Aqtaýda TurkSkills – túrki álemi elderiniń jumysshy mamandyqtary chempıonaty ótedi. Sondaı-aq elimizde Ata-analar komıtetiniń alǵashqy respýblıkalyq forýmy uıymdastyrylady», dedi Ǵ.Beısembaev.
Mınıstrliktiń deregine súıenip ózgeristerdi naqtylaı ketsek, 1-synyptan bastap 11-synypqa deıin barlyq oqýshy úshin oqytý úrdisine balalardyń jas erekshelikterin eskere otyryp, jasandy ıntellekt (JI) negizderi engiziledi. JI qoldaný men onyń etıkasyn túsindiretin ınteraktıvti modýlderden turatyn «Day of AI» onlaın kýrsy barlyq oqýshyǵa qoljetimdi bolady. 10–11 synyp oqýshylaryna bastapqy kásibı biliktilik beretin erte beıindik baǵdarlaý júzege asyrylady. Al «Keleshek mektepterinde» 7-synyptan bastap oqýshylarǵa kásibı baǵdar berý qolǵa alynady. Qazir «Maman» dep atalatyn arnaıy platforma ázirlenip, jetildirilip jatyr. Soǵan sáıkes ár balanyń ıkemi, qyzyǵýshylyǵy, múmkindigi eskerilip, baǵdarlaý jumystary júrgiziledi.
Jańa oqý jylynda balalardyń psıhologııalyq qysymnan, basqa da ómirine qaýip tóndiretin jaǵdaılardan qorǵaý baǵyty da basty nazarda bolatyny belgili. Osyǵan qatysty mınıstrlik: «Jeke qaýipsizdik sabaqtary qaıta jandanady. Endi bul eldegi barlyq balabaqshada, mektepte, kolledjde ár apta saıyn synyp saǵatynda 10 mınýttan ótedi. Sabaqtarda ınternettegi qaýipsizdik erejeleri, alaıaqtardan qorǵaný joldary, tótenshe jaǵdaı kezindegi is-qımyldar jáne zorlyq-zombylyqtyń aldyn alý taqyryptary qamtylady. Balalarǵa psıhologııalyq qoldaý kórsetetin 20 ortalyqta býllıng, zorlyq-zombylyq jáne daǵdarys jaǵdaılaryna baılanysty oqýshylarǵa, ata-analarǵa jáne pedagogterge táýlik boıy kómek kórsetedi. «111» baılanys ortalyǵynyń QR-kodtary barlyq mektepke japsyryldy. Balalar óz quqyqtarynyń buzylýy týraly anonımdi ári jedel habarlaı alady. Býllıng úshin ákimshilik jaýapkershilik belgilendi: aıyppul – 10 AEK, al qaıtalanǵan jaǵdaıda – 30 AEK. Avtobýs júrgizýshilerine 16 jasqa deıingi balalardy qoǵamdyq kólikten eresektersiz májbúrlep túsirip ketýge bolmaıdy. Erejeni buzý ákimshilik jaýapkershilikke ákelip soǵady», degen málimdeme taratty.